Tottenham midfielder Dejan Kulusevski chuan minute 90-naah an si phurh sutna goal a tauh lut a, Manchester City nen an inkhel hmuhnawmah 3-3 in an inhnehtawk.
Etihad Stadium a Pathianni zan inkhelah City in minute 81-naah Erling Haaland-a ball cross atanga Jack Grealish goal khung chu hnehna an chanpuina tur niin an ngai tawh a. English midfielder Grealish hian April thla hnua goal a khung hmasak ber niin season tha a hman loh avanga sawiselna awmte a chhanglet.
Mahse Tottenham in inkhel zawh hma in goal an khung leh thei a, hemi hnuah hian City in inkhel tawp hma in goal hlauhawm siam theihna hun nei mahse referee Simon Hooper chuan Haaland-a laka foul chu ham lova ‘advantage’ a pek zet hnuah a ham leh si a. City player-te an lawm lo hle.
Tottenham in Son Heung-min hmangin goal an khung hma hle a, mahse minute thum hnu lekah Spurs captain hian an lamah Julian Alvarez ball cross a ti lut.
First half-ah Phil Foden-a’n City goal hnihna a khung a. Second half-ah Giovani Lo Celso chuan Tottenham goal hnihna a khung ve leh a ni.
City in point an hloh avangin pathumnaah an tla thla a. Manchester City boss Pep Guardiola chuan, “Chance kan insiam hnem a, kan huaisen bawk a, table chung bera kir leh duhin kan khel.”
“Kan result leh inkhel kaldan kha a pawi a, mahse football hi hetiang hi a ni thin. Kan phu ang tak hi kan hmu fo thin lo a ni.” tiin a sawi.
- Blues an chak
Chelsea in halftime dawnah captain Conor Gallagher chu yellow card a hmuh nawn avangin chan mahse hnehna an chang thova, Brighton & Hove Albion 3-2 in an hneh.
Stamford Bridge-ah midfielder Enzo Fernandez chuan goal hnih a khung a. Minute 17-naah an goal hmasa khungin Levi Colwill-a’n an goal hnihna khungin minute 65-naah Fernandez bawkin penalty atangin goal a khung.
Brighton in halftime dawn leh huntawp dawnah Facundo Buonanotte leh Joao Pedro te hmangin goal an khung ve bawk.
Chelsea manager Mauricio Pochettino chuan, “11 vs 11 a nihlaiin kan kheltha viau a, second half-ah kan tlem zawk hnuah erawh a harsa deuh. Brighton hi an that avangin theihtawp tak zet chhuah a kan inkhelh a ngai a ni.” a ti.
- Reds an comeback
Liverpool in Anfield-ah tlawm thei dinhmuna an din laiin huntawp dawnah goal hnih an khung a, 4-3 in Fulham an lehthal.
Fulham keeper Bernd Leno own goal an neih hnuah Harry Wilson chuan Fulham si phurh a sut a. Reds tan Alexis Mac Allister chuan khung lehin Kenny Tete chuan a sut leh.
Second half-ah Fulham in Bobby De Cordova-Reid hmanga an khung chu Wataru Endo leh Trent Alexander-Arnold ten goal khungin an chhanglet.