Aizawl: ZPM Working President K Sapdanga’n tlin chhanah mipui hnena sorkar kalphung thar, mipui sorkar an tiam chu an enchhin duh vang nia a hriat thu a sawi.
K Sapdanga chuan tun tum MLA inthlanpuiah Pathian leh mipui zarah tlin an inbeisei tih sawiin, “Beisei dan hi neih thiam a har khawp mai a. Chutih laiin, Pathian leh mipui zarah kan sorkar hi chu ka ring a. A result zat erawh hi chu 25 atanga 30 hi chu ka rin dan a ni,” tiin nimin chhun khan ZPM pisa-ah The Zozam Times zawhna a chhang.
ZPM tlin chhan sawiin K Sapdanga chuan, “Kan tawngtai thin a. Pathian hnenah hnehna min pe turin kan dil a. Chu chu Pathianin a hria a, mipuite hmangin hnehna min pe a. Mipute hnenah sorkar kalphung thar, mipui sorkar kan tiam a, chu chu mipuiin eng ang nge a nih hriat an duh a. Chu chu min enchhin duh niin kan hria,” a ti.
K Sapdanga chuan ZPM leader kaihhruainain Val Upa Council (VUC) te nen an inrawnkhawm hnuah, remchang hmasa berah sorkar thar chu din an tum thu a sawi a. “ZPM-ah chuan bawm tawt hi a awm ve lo va, kan party discipline hi a tha a, kan elpui party-ten namen lova min sawisel ang hi a ni lo va. Chuvangin, ZPM ah chuan discipline hi a that avangin pathian khawngaihna zarah nihna inruat chungchangah harsatna kan neih ka ring lo,” tiin, chief minister leh VUC ten council of ministers an ruata an thutlukna chu an pawm mai tur thu a sawi bawk.