Aizawl: MNF party chuan MLA inthlanpui neih zawh taka MNF candidate-te duhsak taka vote-tute chungah lawm thu sawiin sorkarna siam tur ZPM an lawmpui thu an sawi.
Nimina thuchhuah an siamah MNF chuan Mizoram mipuite duhthlanna hmanga thlan tlin, sorkar thar hmel hmuh a ni dawn ta tih an sawi a. Sorkarna siam tur ZPM chu Mizo mipuiten beiseina nena an thlirte tihlawhtling tur leh thahnemngai taka thawk turin duhsakna an hlan.
MNF chuan MNF candidate thlan tlinte leh party dang candidate thlan tlin zawng zawngte chu an lawmpui thu an sawi a. MNF MLA thlan tlinte pawh eptu MLA tangkai tak ni turin duhsakna hlanin, tling zo ve ta lo zawng zawngte thinlung taka an tawrhpui thu an tar lang a. Sorkar thar hmalakna ngun taka thlirin, MNF chuan Mizoram leh hnam tan theihtawp chhuahin hna a thawk chhunzawm zel dawn tiin an tar lang bawk.