MNF President leh chief minister ni bawk, Zoramthanga chuan tun tum Mizoram state assembly inthlanpuia an tlak avang hian an party leh a mi malah pawh engmah nghawng a neih a rin loh thu a sawi.
Thawhtanni tlai khan Zoramthanga’n chief minister a nihna atanga bânna chu Mizoram Larsap Dr Hari Babu Kambhampati hnenah a theh lut a. Hemi zawha thu thar thehdarhtute zawhna chhangin Zoramthanga chuan Covid-19 leng avanga harsatna namen lo an tawk chu eptu lamin remchangah lain an fel loh vangah an puh a. Hei hi mipuiah an inhrilhfiah sen tawh loh avangin sorkar lai duhkhawp tawk lohna, sorkar dinglai paihthlak duhna lian tak chu an tlak chhan niin a sawi.
Tun tum MLA inthlanpuia an chak loh avang hian an party, MNF leh a mi malah nghawng a neih a rin loh thu sawiin, “Inthlanah kan tla fo tawh a. Kum 1986 atangin inthlanah kan tling a, kan tla a, a dawtah a aia chakin kan tho chhuak fo thin. Chuvangin, MNF movement kal danah leh keimahah hian Pathian zara dam têa kan awm chuan engmah nghawng a neih ka ring lo,” tiin The Zozam Times zawhna a chhang.