Aizawl: MPCC President Lalsawta chuan 2023 Mizoram Assembly inthlanpuiah an duh ang result nei thei lo mah se, ram leh hnam tana thawhna kawngah ralbang thei an nih loh thu a sawi.
Thawhtannia MLA inthlanpui result puan a nih hnuah MPCC chuan Congress Bhawan-ah inkhawm an buatsaih a. He huna thu sawitu Lalsawta chuan, “Pathianin engkim tan hun a ruat a. Theihtawpin, Congress party mipuite kan tang a. Theihtawpin kan zavaiin kan thawk a, Kan hun a la her rih lo a ni,” tiin, Congress party duhsaktu Mizoram mipuite chungah lawmthu a sawi.
Lalsawta chuan Congress party mipui, an candidate-te thawhrimna leh inpekna, an huaisenna zawng zawngah lawmthu sawiin, “Kan duh ang result nei thei lo mah ila ram leh hnam tana thawhna kawngah ralbang thei kan ni lo. Zam lovin, theihtawpin a hma aia nasa zawkin kan thawh a ngai a ni,” tiin, an tih tur kawng tinrengah inluangrualna nen hma lam panin ram tana thawk zui zel turin Congress party mipuite a sawm.
Lalsawta chuan Congress party candidate thlan tlin awm chhun, Lawngtlai West biala thlan tlin, C Ngunlianchunga chu a lawmpui thu a sawi a. “Mizoram mipuiin duh taka an thlan MNF leh ZPM MLA te ka lawmpui a, sorkarna siam tur ZPM party chu Mizoram tana sorkar tha tak siam turin duhsakna ka hlan a, Mizoram mipui zawng zawngin a zar an zo theih tur sorkar tha an siam ngei theihna turin duhsakna kan hlan a ni,” a ti.
Congress Legislature Party Leader Zodintluanga Ralte pawhin thu sawiin, “Mizoram hmun hrang hrang atangin tawrhpuina kan dawng a, zam lo tur leh ram tana theihtawp chhuah zual sauh turin min ngen a. Chutiang tur chuan rilru thar nen kan ram leh hnam tana party mi zawng zawng nasa zawka thawk zel turin ka sawm che u a ni,” a ti.