Tunlai European football a player mal a che tha ber zing ami, England leh Real Madrid midfielder Jude Bellingham chuan Thawhtanni zan khan Europe a Under-21 player tha ber chawimawina 2023 Golden Boy Award a dawng.
Bellingham hian Turin-ah Italian chanchinbu lian Tuttosport in a buatsaih chawimawina hi a dawng a. Tun season-ah nipui laia Borussia Dortmund atanga Real Madrid a pan hnuah che tha hle in match 17 a khelh tawh atangin goal 15 a khung tawh a, assist vawi 4 a nei bawk.
Bellingham hian tun tum chawimawina dawng tur hian record thar a siam a, a thlangtute atanga point hmuh theih zat 500 awm thei atang point 485 a hmu a, he chawimawina dawng tura point hmu hnem ber a la ni.
England international hi Real Madrid player zinga he chawimawina dawng hmasa ber a ni a. Kum 2003 atang Golden Boy Award hi sem tan niin Spanish football a midfielder beiseiawmin a kum thumna atana an dawnna niin nikum leh nikum hmasa khan Barcelona midfielder Gavi leh Pedri ten an lo dawng tawh.
Chawimawina dawng tur hian Europe atanga chanchinbumi thlan bik 50 ten player panga an thlang a, pakhatna in point 10 hmu in pahnihna in point sarih an hmu a. Pathumna in point nga, palina in point thum leh pangana in point khat an hmu.
Bayern Munich forward Jamal Musiala chuan point 285 hmu in pahnihna a ni a. Barcelona forward Lamine Yamal chuan point 92 hmu in pathumna a ni bawk.