Aizawl: Ex-Fighting Fifth Association (EFFA), Mizoramten Chhamb Battle Honour Day vawi 52-na an hman chu C Lalrambuatsaiha, President, Mizoram Journalists’ Association chuan khuallian niin niin khan a hman pui.
ZTS Picnic Spot, Kelsih-a hun hmanah MJA President C Lalrambuatsaiha chuan thalaite tan sipai a tan tam tha a tih thu leh Mizo sipai officer an la tam tawk lo chu hemi lama hmala tu pawimawh tak, Mizorama Sainik School tihchangtlung zel a pawimawh tih a sawi a, hei bakah hian Nagaland pawhin an mahni puala regiment an neih ang bawkin Mizoten Mizo Regiment neih ve vat tul a tih thu a sawi tel bawk.
5th Bn. Assam Regiment atanga pension chhuaka intelkhawm Ex-Fighting 5th Association (EFFA) ten an regiment-in kum 1971-a India leh Pakistan Indonaa Chhamb hmuna an chet that avanga Honour of Battle an hmuh hriatrengna hi kum tin December 5-ah an hmang thin a ni.
EFFA-ah hian sipai bangte bakah indonaa pasalthate hmeithai, an pasalten an boralsan tawhte pawh an tel a. Kumin hian an member boral Zokaichhunga, Vaivakawn leh kum 1971 indonaa sipai 24 thite sunna leh hriatrengna hun an hmang nghal bawk.
Covid-19 leh harsatna dang avangin kumin May 22-25 inkar khan W. Bengal a Kalimpong hmunah kum 1971 India-Pakistan hnehna hriat rengna kum 50-na, golden jubilee hman a ni a, Mizoram atangin EFFA member 60 chuang an zuk tel ve bawk a ni.