Mizoram Police in hnehna pawimawh an chang a, FC Venghnuai lakah goal nga khungin round 12-naah hmahruaitu an ni lailawk.
Thawhlehni ah Zote Toyota Mizoram Premier League Season 10 round 12-na khelh a ni a. Second phase kheltha tak Police in nikum final khel FC Venghnuai an hmachhawn.
Venghnuai hi an khingpuite ang bawka MPL season chawhnu lam che tha an ni an player fitness tha leh tha za hmaah Police player tawnhriat neithate an inlan.
Police lamin minute 32-naah goal an khung a, midfielder tawnhriat ngah tawh R. Malsawmtluanga’n goal hmasa ber a khung. Halftime hma in Police in F. Lallawmkima hmangin goal an khung belh a. Police dinhmun thaah an hlangkai.
Second half-ah pawh Police bawkin bul an tan tha. MS-a bawkin minute 58-naah goal a khung leh a, goal thum in an sang tawh.
Venghnuai tan J. Lalbiaknia’n beiseina siamin goal khat a khung a, mahse an hmabak a ko tawh.
Inkhel tawp dawnah Venghnuai inthlahdul chu Police in remchangah an la. Lalbiaksanga leh Lalbiakhlua ten minute hnih chhunga goal hnih khungin Police dinhmun a tha hle a. Huntawp hma in Venghnuai in C. Ramdinmawia hmangin goal khat an khung ve leh hman a ni.
Inkhel hnuhnung zawkah Chhinga Veng FC in Venghnuai laka an tlawmna nawtreh nghalin champion lai Chawnpui FC 2-1 in an hneh a. Chhinga Veng tan MS Dawngliana’n penalty a khung bakah Lallawmsanga chuan second half-ah an chakna goal a khung.