Indiana Pacers chuan NBA In-Season Tournament kal mekah semi-final an lut a, 122-112 in Boston Celtics an hneh.
Indianapolis a Pacers court Gainbridge Fieldhouse-ah Eastern Conference quarter-final inkhel hi nghah a ni a. Pacers tan All-Star guard kum 23 mi Tyrese Haliburton a che tha.
Haliburton hian NBA a khelh chhunga a vawikhatna atan triple-double a nei a, huntawp hma minute 1 leh second 33 a la awmin point li an hmuh theihna turin pawimawh takin a che a. Point 10 a sang zawka hnehna an chan theih chhan lian tak a ni.
Haliburton hian point 26 score in rebound 10 leh assist 13 a nei a. A point 26 zinga 16 hi second half-a a score vek a ni a. Myles Turner chuan point 17 leh rebound 10 thawh ve bawkin Pacers player dang pasarih in point 10 aia tam an score bawk.
Indiana hi tun In-Season tournament bikah hian che tha in tournament inkhel bikah an la tlawm miah lo.
Boston tan star player pahnih Jayson Tatum leh Jaylen Brown te an che tha a, Tatum-a’n point 32 leh rebound 12 a nei a, Brown-a’n point 30 a thawh.
Pacers hian tukin a New York Knicks leh Milwaukee Bucks inkhel a chak zawk chu semi-final ah an hmachhawn ve leh ang.