India-in man a duh em em, Jais-e-Mohammed firfiak pawla an hotupa ber leh a dintu ni bawk, Masood Azhar-a unaupa, Abdul Rauf Asghar chu Pakistan chuan an man niin an sawi a. Mi firfiak pawla tel mi 44 an man tel zingah a tel niin Pakistan minister pakhatin a sawi.
Heng mite manna tur thupek hi nimin khan tihchhuah a ni a. Thupekah chuan, “National Action Plan (NAP)-in a phal angin, March 4, 2019-a Ministry of Interior a high level meeting-ah, province tina sorkar aiawhte telna chuan pawl hrang hrang lakah khauh zawka kal a rel a. An zinga mi 44 chu man tur an ni a, heng zingah hian Mufti Abdul Raoof leh Hamad Azhar pawh an tel a. Heng thutlukna hi National Security Committee (NSC)-in a siam niin National Action Plan a duan anga tih a ni,” an ti.
India-in a man duh, Masood Azhar-a ber hian Pakistan-a Punjab province-ah, Bahawalpur-ah kum 2000 khan Jaish-e-Mohammed hi a din a. Tuna kum 50-a upa ni tawh, Azhar hi NDA sorkar chuan kum 1999 khan Indian Airlines plane IC-814 thlawhna hruai kawia chuangte tlan nan a chhuah a ni.
Amah hi kum 2001-a Indian Parliament beihnaa a bultumtu ber nia hriat a ni a. Hei bakah hian thihchilha Jammu & Kashmir state assembly beihnaah te, Pathankot IAF base beihna leh Pulwama-a tun hnaia thihchilha CRPF sipai beihnaah te pawh a thluak bur nia hriat a ni.