Aizawl: Synod Inkhawmpui vawi 100-na chu Mission Veng Kohhran Biak Inah nimin atang khan neih tan a ni a. Inkhawmpui hian Pathianni thleng a awh ang.
Synod Inkhawmpuiah hian nimin khan Nomination Committee an thu a. December 6 – 9, 2023 chhungin rorel a ni ang a, zan lamah vantlang Pathian biak inkhawm neih thin a ni ang.
Pathianni chawhmaah pastor nemngheh leh pro. pastor dah ngheh inkhawm a ni ang a, chawhnuah Lalpa zanriah sakramen inkhawm a ni ang a, zan inkhawmah moderator valedictory sermon a ni ang.
Kumin Synod Inkhawmpui thlarau lam thupui chu ‘Kraws pua Isua zui’ (Luka 9 : 23) a ni a, December 9, 2023 (Inrinni) zanah Rev. John Raldosanga, Bethlehem Venglaiin thlarau lam thupui a sawi ang.
Synod Inkhawmpui hi kum 2010 atang khan bialin an thleng tan a, kumin 2023 hian Mission Veng bialin Mission Veng Kohhranah an thleng a ni.
Kum 1925 khan Assembly tiin inkhawmpui hmasa ber hi Mission Veng Kohhran Biak Inah neih a ni a, Rev. FJ Sandy chu moderator hmasa ber a ni a. Mizo zinga moderator hmasa ber chu Rev. Chhuahkhama niin kum 1932 khan moderator a ni a. Secretary hmasa ber chu Upa Chawnghnuaia a ni bawk.
Kum 1933 atangin treasurer neih a ni a, Rev. EH Williams leh Rev. EL Mendus te chu a hmasa ber an ni a, Mizo zinga treasurer hmasa ber chu Muka a ni a. Kum 1973 atangin treasurer tih chu finance officer tia thlak a ni ta bawk.
Inkhawmpui hi kum 1925 atanga 1952 thleng assembly tih a ni a, 1953 atangin Synod tia thlak a ni ta a ni.
Kum 1961 khan February leh December thlaah inkhawmpui neih a nih avangin kumin hi a vawi 100-na a ni a. A kum 100-na (centenary) chu kum 2024 hian Mission Vengthlang Kohhran Biak Inah neih a ni ang.
Inkhawmpuia Puipate:
Moderator : Rev. R. Vanlalnghaka
Secretaries : Upa B. Lalhmunliana (Sr.)
& Rev. P.B. Mankima (Jr.)
Finance Officers : Rev. V.L. Luaia Hranleh
(Executive Secretary)
& Rev. P.C. Pachhunga
Statistician : Upa. Dr. Lalnunsiama Colney
Senior Exe. Secy. : Rev. C. Zorammawia
Executive Secretary : Rev. Dr. K. Lallawmzuala