BJP hian heartland state-a an chakna pathum – Madhya Pradesh, Rajasthan leh Chhattisgarh-ah chuan chief minister turin mi thar an thlang dawn nia sawi a ni a. Kum 2024-a ram inthlanpui awm tur thlirin sorkar hotu lu ber hi an thlang dawn nia sawi a ni bawk.
State pathumah hian saffron party hian chief minister ni tawh an nei vek a, thlan tlin an ni vek hlawm bawk a. Hengte hi Shivraj Singh Chouhan, Vasundhara Raje leh Raman Singh te an ni a; mahse, chief minister tur thlanah hian hengho hi an ni kher dawn lo niin party chuan a sawi.
BJP hian Pathiannia vote tlate chhiar takah khan Madhya Pradesh, Rajasthan leh Chhattisgarh-ah hnehna an chang a. Party laipuia an hruaitute chuan state pathuma sorkar hruaitu tur hi an sawiho mek.
Nilainia darkar li leh a chanve zet Prime Minister Narendra Modi-a chenna ina hotu lawk thukhawm chuan ni theite an sawiho tawh a. Hetah hian prime minister bakah Home Minister Amit Shah leh BJP chief JP Nadda te an tel.
He thutkhawm zawhah hian Shah leh Nadda hian state pathuma an party in-charge theuhte kawmin an ngaihdan an rawn kual leh bawk.
BJP hian state pathumah hian observer an ruat bawk a. Heng observer-te hian MLA atana thlan tharte hi kawmin an hruaitu turte pawh an thlanpui dawn a ni.
Madhya Pradesh-ah chuan Chief Minister Shivraj Singh Chouhan-a bawk sawi rik rin leh ber a ni a. Ani bakah hian union minister pathum – Prahlad Patel, Jyotiraditya Scindia leh Narendra Singh Tomar te pawh an awm a, an state-a an hruaitu hlun, Kailash Vijayvargiya a awm bawk.
Rajasthan-ah pawh chanvo sang ber chelh tur âwm tak tak an awm nual a. Chief minister hlui, Raje-i pawh thlan tlin leh a nih bakah Lok Sabha Speaker Om Birla te, union minister pahnih – Gajendra Singh Shekhawat leh Arjun Ram Meghwal te, state party president C P Joshi bakah an hruaitu hlun, Diya Kumari leh Mahant Balaknath te pawh ni thei vek an ni.
Chhattisgarh-ah chuan chief minister hlui, Raman Singh-a chu langsar ber a ni a. State BJP President Arun Kumar Sao, term liam taa eptu hruaitu Dharamlal Kaushik leh IAS officer hlui, O P Chaudhary te pawh chief minister thutthlenga thu âwm tak an ni hlawm bawk.
Hming langsar tak tak zingah hian BJP hruaitute hian rin loh tak pawh an thlang thei nia sawi a ni mek bawk.