- Ruata
Suzuki chuan Japan-ah 2024 Swift chu an tlangzarh ta a, India rama kan hmuh tur nen erawh thil thenkhatah a inan loh hret hmel a ni.
Swift thar tur hi kumin October thlaa Tokyo Motor Show-ah khan an lo phochhuak tawh a. Khatah khan Suzuki khawl thar, 1.2 litre, 3 cylinder petrol khawl (Z12E) a human tur thu lo tarlan tawh a ni a. He khawl hi Suzuki khawla Z-series hoa mi a ni. Tunah hian Swift thar tura a transmission lam leh thil hrang hrang kan tarlan belh thei dawn a ni.
Japanese market tan bik hian Suzuki Swift chhuak thar hian 1,197cc, 12-valve DOHC engine, 82hp power 5,700rpm-a pechhuak thei leh 108Nm torque 4,500rpm-a pechhuak thei te a hmang dawn a. Tunah hi chuan transmission lamah chuan CVT gearbox chauh duhthlan tur a awm rih a ni. Suzuki hian mild-hybrid technology dah telin hei hian 3.1hp power leh 60Nm torque chu DC synchronous motor hmangin a pekchhuah belh ve zeuh dawn a ni. A tui heh zawng lam chu standard leh mild-hybrid Swift te hian an indawt dan hian 23.4kpl leh 24.5kpl te WLTP cycle-ah an pechhuak dawn a ni.
Volumetric efficiency leh torque pekchhuah lamah Z Series khawl te hi tuna India rama kan hmuh K Series khawl ho aiin a tha zawk hle dawn a, hetihrual hian K series chu tluk lohna tam tak a nei thung a. Acceleration hniam lamah Z series ho hi a khawl hnathawh a tha lehzual tura ngaih a ni. Tuna K12 engine, Swift-a kan hmuh hi four-cylinder unit niin 1,197cc 90hp power chu 6,000rpm ah pechhuak thei a, 113Nm torque chu 4,400rpm-ah a pechhuak thei a. Suzuki Swift Japan-a tihchhuahah hian khawvel hmundanga chhuak thin ang bawkin 4WD versions pawh a awm tel dawn a ni.
- India rama 2024 Maruti Swift turah eng nge kan hmuh dawn?
2024 Suzuki Swift hi India ramah Maruti Suzuki Swift angin nakum kum chanve hnulamah hian an tihchhuah hman beisei a ni a. Japana kan hmuh ang Z-series khawl thar Z12E khawl hi kan hmuh ve hmel a. Hetihrual hian a power pechhuak tur leh a khawlina petrol a hehzawng tur chu sawi theih a la ni lo thung a ni. Mild Hrbrid technology pawh kan hmuh tel hmel a, hetihrual hian CVT transmission hi chu India ramah chuan an rawn dah tel ve a rinawm loh thung a ni.
Swift thar tur hian automatic lamah pawh AMT gearbox a la neih chhunzawm zel hmel a, hei bakah hian a hmaa mi ang 5 speed manual kan la hmuh chhunzawm zel hmel a ni. Hmundanga kan hmuh ang 4WD/All Grip ang hi India ramah chuan kan la hmuh loh chhunzawm zel hmel bawk a, a hmaa chhuak ang bawkin front wheel drive (a ke hma pahnih phih kal) a la nih zel a beiseiawm a ni.
India ramah hian 2024 Swift nakuma lo chhuak tur hi enchhin tan a ni tawh a. Khawlaiah te pawh road testing kalpui char char a ni tawh a. Thla thar chhoah hi chuan he lirthei thar tura kan hriat tur tul hrang hrang kan hriat belh leh zel beisei a ni.
- Lirthei chuai thei lo Swift!
India rama a lo chhuah atangin Maruti Suzuki Swift hi lirthei hralh kal leh mite duh tawp theih loh tun thlengin a la ni a, Mizoramah ngei pawh hatchback changkang ve deuh huanga lirthei lei hlawh berte zinga mi a la ni reng a ni. Tunah pawh company lam hian an hralh hnem malh malh viau a ni. Lirthei chei thin te tan pawha chei nuam, intlansiak thin te thlenga an hman tam, Maruti Suzuki lirthei tha leh market lamah pawh tlo em em, chuai thei lo, Swift hi a vanglai a la ni thei reng mai a. He hatchback hralh kal leh mawi lei tumte hi chuan la nghah zel chi te pawh a ni ang a, chutihrualin tuna chhuak mek pawh hi a mawiin lei man hla tak a ni zel tho a ni.