Tui hi mihring taksa tana pawimawh tak pakhat a ni a. Mihring taksaah hian 55% – 78% tui a awm a. Kan taksa hriselna hi kan tui in tam leh tam lovah a innghat thui em em a, mi thiamte chuan ni tin tui no 8 – 10 tal in turin min duh a ni.
- Tui in tam hlawkna
- Taksa chau a chhawk: Kan taksa a chau/kulcho fo a nih chuan, tui kan in tam tawk loh vang a ni tlangpui thin a, chuvangin tui in tam hian taksa chau tur a vengin, a nihna tur angin hna a thawhtir thei thin a ni.
- Rilru put hmang a siam tha thin: Zir chianna atanga a landan chuan tui in tam tawk loh vangin mihring hi kan rilru put hmang a lo danglam thei a, tui in tlem chuan rilru put hmang a lo hniamin, a ngaihtuahna a ti tawi thei a, chuvangin tui in tam hi a pawimawh hle a ni.
- Lu na, lu na benvawn neite tan: Lu na leh lu na benvawn nei thinte hi taksain tui a tlakchham vang a ni fo va, a damdawi tha ber chu tui a tam thei ang ber in hi a ni.
- Chaw pai tawih leh inthiarna kawngah min pui thui hle bawk a ni: Tui (a bikin tui lum) in tam hian taksa hna a thawh that tirin, chaw pai tawih kawngah nasa takin a pui a ni.
- Rihna a tlakhniam tir thei: Cher duh tan chuan tui a tangkai hle. Tui kan in tam chuan chaw chakna kan nei tlem a, chaw kan ei tlem phah a. Chu chuan taksa rihna a tihniam thei a ni.
- Tûr paih faitu a ni: Tui hian kan taksaa tûr awm te, kan zun leh thlan hmangten min paih chhuahsak a. Kal a tifaiin, lungte awm tur a veng a, chuvangin kan mamawh tawk ang zelin tui in hi a pawimawh em em a ni.
- Taksa lum leh vawh dan a vawng: Tui in tam hian kan taksa lum leh vawh dan hi inbuk tawka siamin, keimahni min ti harhvang a, taksa sil leh rawl te a veng a ni.
- Vun a ti hrisel: Tui hian thisen zam kal dan ti mumalin, vun a tinung a. Ti mur a ti hriselin vun eng leh mam min neihtir a ni.
- Zu in mi tan: Zu in tam chuan taksaah tui a titlemin taksa a tichau em em thin a. Chuvang chuan tui hi damdawi pawimawh tak pakhat a ni.
- Thaw rimchhia a tireh: Tui in tam leh chaw eikhama mumal taka kam thuah hian ka a tifaiin natna hrik insiam theihna tur a veng a, thaw rimchhia kan neih loh phah thin a ni.
Heng bakah hian tui chauh ni lovin, thei leh thlai tui pai tam chi kan ei hian taksa tan a thain, min ti hrisel bawk thin a ni.