Borussia Dortmund in DFB Pokal round of 16 an pel zo lova, VfB Stuttgart lakah 2-0 a tlawmin Nilaini zanah an tla.
Arena Ludwigsburg a inkhelah hian Stuttgart tan tunlaia ngaihven hlawh tak an striker Serhou Guirassy chuan goal a khung a. Silas Katompa Mvumpa chuan goal dang a khung.
Inkhel tan atangin Stuttgart zawkin goal hlauhawm an siam hnem a, chance tha an neih an hloh nual. Dortmund tlarhnung a nghet lo viau a, an goal nawr a nat loh bakah Stuttgart forward te ven an harsat.
First half a goal a luh loh hnuah tun season a league goal 16 khung tawh Guinea international Guirassy leh Enzo Millot te inkawpin goal hlauhawm siamin Millot ball pek atang German Cup a a goal hnihna minute 54-naah Guirassy-a’n a khung.
Minute 78-naah Stuttgart in an goal hnihna an hlawhchhuak a, an goal hmasa ang bawkin Dortmund tlarhnung awlsam taka paltlangin Silas-a’n Gregor Kobel-a goal ah a khung.
Bundesliga a pathumna ni mek Stuttgart in tun thlaah a vawihnihna atan Dortmund an hnehna a ni a. Dortmund tana chanchin lawmawm lo awm bawkin defender Julian Ryerson in huntawp dawn lamah inhliam avanga khelmual atanga lakchhuah a ngai.
Inkhel dangah Bundesliga hmahruaitu Bayer Leverkusen chuan quarter-final a an hmun an tichiang a, 3-1 in second division club Paderborn an hneh.
BayArena-ah Leverkusen tan Victor Boniface leh Exequiel Palacios ten goal an khung a. Second half tawp lamah Sebastian Klaas chuan goal khat khung ve mahse huntawp hma in Patrik Schick chuan Bayer goal thumna a khung a ni.
Eintracht Frankfurt chu tling lo langsar zingah an tel a. Bundesliga club hian Bayern Munich pet tla tawh tu third division a khel Saarbrücken 2-0 in a hneh lo.