Aizawl: Aizawl District Police hotute chu nimin khan SP Conference Hall-ah Crime Review Meeting neiin an thukhawm a, kumina thubuai ziah luh zingah rukruk thubuai a tam ber tih tar lan a ni.
Thukhawma an tar lan danin kumin November 30 thlengin Aizawl Police Station hrang hrangah thubuai 2,238 ziah luh a ni a, heng zingah rukruk thubuai tam berin, thubuai 1,556 ziah luh a ni a, chung zinga 519 chu charge sheet tawh niin thubuai 293-ah conviction hmuh tawh a ni.
Heng bakah hian tualthah thubuai 10, lirthei chetsualnaa thihna thlena thubuai 26, insual thubuai 40 te ziah luh a ni a, Local and Special Law hnuaia thubuai ziah luh zingah naupang laka hur sualna lam rawngkai, POCSO hnuai thubuai ziah luh 35 awmin, dan lova silai kawl leh hman thubuai 11, ruihhlo kaihhnawih thubuai 21, zu khapna dan MLP Act bawhchhia thubuai 117 ziah luh a ni bawk.
Aizawl SP Rex Zarzoliana Vanchhawng kaihhruai thutkhawmah hian krismas leh kumthar vuakvet mipuiten ralmuang taka an hman theihna tura sorkarin khapna thupek a chhuahte tha taka zawm a nih theih nan dan tur te an sawi ho a, police officer zawng zawngte a tul anga inbuatsaiha hma la theuh tura chah an ni.