Manchester United in ‘tunlai football’ khelh ve an thiam tih an mualah an lantir a, Chelsea lakah chung zawkin 2-1 in an chak.
Nilaini zana Premier League inkhelah United tan midfielder Scott McTominay chu tun season a vawikhatna atan ni lo an chhandamtu a ni a, goal hnih khungin Old Trafford-ah a team chakpuitu a ni.
October thla a Brentford laka huntawp dawna goal hnih khung Scotland midfielder hian minute 19-na leh 69-naah goal a khung a. Hattrick siam theihna huntha pawh a nei.
United in an mualah Chelsea lakah inkhel an thunun a, goal hlauhawm siam hnemin goal shot vawi 28 an nei.
Captain Bruno Fernandes chuan penalty an hmuh a khung lo bawk a. An lamah pawh Blues in goal hlauhawm siam thei ve tho mahse an forward te an hriam zawk avangin United in chak phu in football an khel thei.
Blues tan hian Cole Palmer-a’n mimal season tha a hman chu a chhunzawm bawk a, halftime hma deuhin a finishing tha lantirin goal a khung.
Tunkarah United team chungchangah thuthang a tam viau a, player-ten manager an ring zo tawh lo nia thu thangin chanchinbu mi thenkhatte press conference a tel phal loh an ni hial.
Inkhel zawhah Man Utd boss Erik ten Hag chuan, “Sawiselna te hi chu awm tur a ni a, kan result leh kan inkhelh danah kan lawm hle. Chak kan phu a, a tir minute 30 chhung phei kha chu sawiselna tur kan awm lo.”
“Sawiselnate hian min ti buai lo, ka tawn ngai loh a ni lova, ka club hmasa ah pawh ka tawng fo. Mahse ram lian zawkah chuan a nasa deuh zawk mai a ni.” a ti.
- City an tlawm
Premier League champion Manchester City in Villa Park an tlawh a, Aston Villa lakah talbuai in 1-0 in an tlawm.
Player pawimawh chhawr theih loh an neih nual zingah Rodri a tel a, a tel lova vawi nga an khelh tawhah an tlawm vek.
City in a tir minute 11 chhungin chance vawi hnih an neih bak goal hlauhawm mumal an insiam lova. Lehlamah Villa tan second half-ah Leon Bailey chuan goal a khung a. Pau Torres leh Bailey te goal khung tur City goalkeeper Ederson chuan tha takin a lo dansak tawh bawk.
Manchester City manager Pep Guardiola chuan, “Aston Villa an kheltha zawk hle. First half-ah ball kan chanin kan rang tawk lova, second half-ah insiamtha mah ila ball pek sual kan ngah a, a hmawr bawk tha turin thutlukna kan siam sual thin.” tiin an inkhel a thlirlet.
- Liverpool an san belh
Bramall Lane-ah Liverpool in hmahruaitu Arsenal hnaih sawt turin hnehna an chang a, 2-0 in Sheffield United an hneh.
Reds tan hian first half-ah Trent Alexander-Arnold corner atang Virgil van Dijk chuan goal hmasa zawk a tauh lut a, huntawp dawnah Dominik Szoboszlai chuan an goal hnihna a khung.