Aizawl : Nimin zing dar 7 khan Zoram Driver’s Union, Ngopa Sub-Headquarters huaihawtin Ngopa kawtchhuahah Road Safety Week hawnna hun hman a ni.
He huna khuallian SDO (Civil), Ngopa H. Lalramliana’n India ram pumah road accident avangin minute thum zelah mi pakhat thi ang a nih thu leh Mizoramah kum 2022 chhung khan accident vawi 133 thlenga mithi 57 te chu tlan chak luat vang a nih thu a sawi.
Rui chunga lirthei khalh avangin mi 13 in nunna an chan niin a sawi a. Thihna thleng tam tak chu fimkhur avanga pumpelh theih a nih a rinawm thu a sawi.
H Lalramliana chuan lirthei khalhtute chu hawihhawmna vawng tlat tura chahin, hmanhmawha tlan pelh tumtu thenkhatte chu damlo na tak phur emaw, an chhung te la dam hmel hmuh hman hram tum te an nih theih avangin remchang hmasabera inpelhtir thin turin a chah.
Lirthei khalhtute chu an kutah mi nunna a innghat tih hriaa fimkhurna vawng reng turin SDO (Civil), Ngopa chuan a chah bawk.