United States-ah Utah state-ah, miin intawllen nana an hman nasat tak hmuna vur tleng mi palite chu vur tawlh thut avangin an thi tih thuneituten an sawi.
Salt Lake City bula Millcreek Canyon-a Inrinnia chhiatna thlengah hian mi dang paliin hliam an tuar bawk.
He chhiatna thlenga thi leh hliamte hi inhmelhriat tha tak vek an ni a, kum 23 leh 38 inkar an ni hlawm.
Utah-a vur tawlh thut avanga chhiatna thlengah chuan thi an tam berna pakhat a ni.
Utah Avalanche Center chuan vur tawlh thut chuan heng vur tleng mite hi a hnawl/chhilh niin a sawi.
A hmain he centre hian vur tawlh thut thleng thei a nih thu Twitter-ah an lo tar lang tawh nghe nghe.
A hma ni chiah pawhin a bulah hian a tawlh tawh a; mahse, thi leh hliam an awm lo hlauh.
Tun tuma thil thlengah hian vur tawlhte hi inthuamna tha tak nena thawk chhuak niin avalanche beacon an tih, chhiatna a thlen palha vurin a chhilh pawha chhanchhuaktuten an awmna an hriat mai theih nana radio signal pe chhuak thei pawh an keng.
Dam chhuakte hian anmahni chhilhtu vur hai kuain an chhuak a, chhanchhuah hna thawktute an hrilh nghal.
Chhanchhuah hna thawktute pawh a hmun thleng thuaiin ruang lak chhuah tumin an bei nghal a. Video theh darhah chuan ruangte hi helicopter hmangin hmun hniam lamah an phur tih a lang.
Utah Governor Spencer Cox chuan, “Chhiatna rapthlak tak a ni a, an chhungte leh anmahni tan kan tawngtai reng,” a ti.
“Chhanchhuah ngai an awm tih hriata che chhuak hmasa leh thawk chhuak zawng zawngte chungah lawm thu ka sawi a. Vur tawlh thut hi thleng thei reng a ni a, invaukhanna tihchhuah hi ngai pawimawh turin kan inngen a ni,” a ti bawk.