Central YMA-in Manipur-a Zo hnahthlakte tanpuina tur a thawn chu Central YMA President Lalhmachhuana’n a vai liam.
Zirtawpni zing khan Manipur tual chhung buaina avanga harsatna tawk Zo hnahthlak relief camp-a awm mekte tanpuina tur chu Central YMA chuan buhfai bag 100 leh thawmhnaw lum eng emaw zat leh mutbu te a thawm a. Heng tanpuinate hi Central YMA President Lalhmachhuana’n Tuikhuahtlanga CYMA Office atangin a vai liam a ni.
Central YMA pisa tuala tanpuia thawn puala inkhawm buatsaihah Central YMA President Lalhmachhuana chuan Zofate inpui leh an Jerusalem chu Mizoram hi a ni a, a chhunga cheng Mizoram mipui te hian hmun hrang hrang a an unau Zofate harsatna tawh hi an hrereng a, an theih ang angin an tuamhlawm zel dawn tih a sawi a. Zofate hian harsatna an tawhte hi a tha zawnga inpumkhat zual nan an hman a tul thu a sawi bawk.
He hunah hian Central YMA OB te leh CEC te an tel a. CYMA Vice President Prof. Lalnuntluanga’n tawngtaiin a kal turte Pathian hnenah hlanna a nei bawk.
Myanmar, Manipur leh Bangladesh tualchhung buaina avanga Zo hnahthlak harsatna tawk mekte tanpuina tur hian hmun hrang hrang atangin Central YMA-ah tanpuina (donation) hi a lut thin a, tun thlenga CYMA hnena tanpuina lut tawh hi Rs nuaih 236 chuang ni tawhin, heng atang hian Rs nuaih 167 chuang pekchhuah tawh a ni a. Tun hnaiah Mosia Agency, Aizawl te chuan tanpuina Rs. 2,30,000 an pe bawk.
Hmun hrang hrang atanga Zo hnahthlakte tanpuina petute chungah CYMA chuan lawmthu an sawi.