Bundesliga champion lai Bayern Munich chu tun season ah a vawikhatna atan league inkhelah an tlawm a, Eintracht Frankfurt in an lakah goal nga khungin 5-1 in an sawp.
Frankfurt a Deutsche Bank Park a inkhelah hian Eintracht in inkhel tan atanga minute 36 chhungin goal thum an khung hman a. Omar Marmoush, Eric Ebimbe leh Hugo Larsson ten goal an khung.
Halftime dawnah Joshua Kimmich chuan Bayern tan goal khat khung mahse second half-ah Ebimbe leh Ansgar Knauff ten goal an khung belh leh a ni.
Bayern Munich tan striker rinrawl, nipui a an lakluh atanga an banpui ni nghal Harry Kane chuan khel tluan mahse goal a khung lova. Tun season Bundesliga match 13 a khelh tawhah a tum thum nan chiah goal a khung lo.
An tlawm avangin league hmahruaitu Bayer Leverkusen in point thum in hma an hruai mek a, nizan khan pathumna VfB Stuttgart nen inkhelin an inkar tihzauh theihna hun an nei.
Bayern manager Thomas Tuchel chuan, “Kan ruahmanna ang engmah kan ti lova. Mimal tihsual kan nei hnem a, a pawi thui ta thin a ni.” tiin inkhel a thlirkir.