India rama a vawi khat nan doctor-te chuan hlawhtling takin luruh an thlak ve thei ta a. Pune khawpuiah, hmeichhe naupang kum 4 mi lek chu a luhruh a sawh chhiat 60% zet chu ruh siamchawp, three-dimensional individualised polyethylene bone an tih hmangin an thlaksak a ni.
He ruh lem hi US-a firm pakhatin a luhruh tihchhiat ang chiahin an siamsak a. Doctor-te chuan India-ah hlawhtling taka luruh thlak (skull implant surgery) an tih hmasak ber a ni tih sawiin anmahni pawh an lawm hle a ni.
He hmeichhe naupang hi nikum May 31 khan Shirwal-a lirthei chesualah telin a luruh tam zawk a tichhia a. A tirah hian vawi hnih zai nghal niin damin damdawi in atangin a chhuak a; mahse, doctor-ten kuminah la lut lehin skull implant surgery hi May 18 khan an tihsak ta a ni.
He hmeichha naupang nu hian, “Tunah chuan sikul pawh a kai leh thei tawh a, hlim takin a thiante bulah a awm thei a, a hma ang chiah a ni leh tawh,” tiin a sawi.
A pa hi school bus khalhtu a ni a, an chhungkua hian Kothrud-ah an cheng a ni.
An zaina hmun, Bharati Hospital-a amah zaitu ber, Dr. Jitendra Oswal chuan a hautak hle tih a sawi a, “A insawh na hle a, kan damdawi inah hian engmah hre lovin an lo dah lut a ni,” a ti a. A lu atangin thi a chhuak nasa a, ventilator hmangin an chhan hram a. CT scan-a an en hnuah a luruh chu a hnung lam (occipital bone) sawi chhiain a thluak pawh a khawih deuh va, hei hian a thluakah tuihnang (edema) pawh a luhtir deuh niin a sawi.