Sorkarin kum 16 liam ta chhunga an khaw kalpawhna tur kawng a sialsak theih loh avanga thinrima kawngpui nawr chhuak ngei tum, Himachal Pradesh-a Sirmaur district, Chadbhar khaw mi 15-te chuan ke ngata km 124 kawng zawhin state khawpui, Shimla an thleng a, Chief Minister Jai Ram Thakur hmuh ngei an tum.
Renuka biala khaw pakhata mite hian Pathianni khan an khua chhuahsanin Shimla an pan a. Ni thum leh zan hnih an thang hnuah Thawhlehni chawhnu khan an thleng a. An kal pah hian thuziak an keng a, Himachal Pradesh secretariat tuala inkulha lungawi lova lo awm sate hnenah an lut.
An zinga pakhat, Rajimnder Singh chuan, “Kan state political party lian pahnih hian kawngpui min tiam a, tun thlengin engmah kan la nei lo,” a ti a. Dilawar Singh pawhin, “Kan kawng zawh hi a politics viau a, eng party hamthatna mah thlen kan tum lo thung,” a ti.
An khua hi Churdhar mountains an tiha awm niin kawngpui nei tur chuan km 4 vel he tlang hi hel nan laih a ngai a ni.
Chabhar khua mite hi Paijal, Suchawala, Jo-Ka Bagh leh Khanatia khaw mite pawhin thlawpin an ni hi kawng an nei that loh avanga buai ve tho an ni.
Chief minister hian programme ruahman sa a lo neih nual avangin an la hmu thei rih lo va, nghah zel an tum.
Chief minister hmasa, Virbhadra Singh khan kum 2002 khan Naurdhar Chadbdhar kawng siamna tur Rs. Nuai 40 a dah a, hna erawh thawh a ni lo va, tuna mi pawhin a thawhsak chuang lo. Khaw mite hian Lok Sabha MP, CM, MLA leh a ti thei âwm party an hmuh teuh tawh bawk.