Spanish club Girona in tun season a La Liga title chuhtu zinga an tel chu thil mak a ni lo tih an lantir a. Barcelona khelmualah 4-2 in hnehna an chang.
Pathianni zanah Catalan club pahnih hi Estadi Olímpic Lluís Companys-ah an inkhel a. Girona hian Barcelona lakah a vawikhatna atan hnehna changin Artem Dovbyk, Miguel Gutierrez, Valery Fernandez leh Cristhian Stuani ten goal an khung.
Barcelona tan Robert Lewandowski chuan first half-ah goal a khung a, second half tawp dawn lamah Ilkay Gundogan chuan goal khat dang a khung ve leh bawk.
Hnehna an chan avangin Girona hi table chung berah an kir leh a, Real Madrid lakah point hnihin an sang zawk.
Girona coach Michel chuan, “He team hian inrintawkna lian tak leh chhungril a nunna an nei a, tupawh hmachhawn se an hneh thei a ni tih hi an ring tlat thin.”
“Barcelona in ball chuhin mi an bawr nasa dawn tih kan hria a, chuvangin ball kan chan a, awmze nei zawka ball kan inpek kual theih chuan hlauhawm theihna hun kan insiam thin dawn tih kan hria a ni.” tiin an chak hnuah an inkhel a thlirlet.