Chief Minister Lalduhoma chuan sorkar leh tlaka mipuiin an ngaih theih nan tlak huamin hna an thawk dawn tih a sawi.

Thawhtannia an party pisaa chhung inkhawm hun an hmanah ZPM leader ni bawk, Lalduhoma chuan ram mipuiin an enchhin tih sawiin, “Min enchhin zel turin kan duh. Kan hnathawh atangin mipuiin min endik se, sorkar leh tlaka min ngaih theih nan tlak huamin hna kan thawk dawn a. Ni 100 chhunga kan tih tur kan puante khawng takin kan kalpui dawn a ni,” a ti.

Inthlan zawh takah khan a beisei aia tlem an tlin thu sawiin Lalduhoma chuan, “Kan tlin lohna tam tak chu sum leh pai vang a ni. Sorkar siamtu ni mah ila, sum leh pai hmangin vote kan zawng ve dawn lo. A bikin minority area lamah kan tling mumal lo,” tih sawiin, ram puma rual taka mipui an kal tlan theih nan thianghlim taka hma an lak tur thu a sawi.

Lalduhoma chuan chief minister-in works department chang lo tura an intiam ang ngeiin works department a chan loh thu sawiin, “Bial tin ka enkawlpui vek zawk dawn a ni. Kan dinhmun hi Pathian remruat, kan tawngtai chhanna a ni a. Mipui, neutral-te avangin hnehna kan chang a. Neutral an tam poh leh ram a kal tha dawn a, party ruihchilhna hi kan kalsan tial tial a ngai. Keini ZPM hian mipui beng kan tithlep tur a ni lo. Keinin mipui kan tihbeidawn chuan Zoram mipuite hian beisei tur dang an nei tawh lo vang,” a ti.

Bial tinin minister an duh vek a; mahse, minister bial nih châk hi thil awm dan an hriat tawk loh vang a nih thu sawiin Lalduhoma chuan, “Mipui sorkarah chuan minister leh MLA an inthlau vak dawn lo va. MLA-ten department an enkawl dawn loh avangin bial tan leh ram mipui tan theihtawpin an thawk thei zawk dawn a ni,” tiin, MLA taima tak bial nih a hlawk ber zawk dawn tih a sawi.

Lalduhoma chuan sorkar term hmasaa MLA-ten tha takin hna an thawk a, an hlimthlaah tunah hian an awm mek nia sawiin, “Kalphung tharah chuan eng hna pawh a tha hle tur a ni. Mipuiten min thlir reng a, tibeidawngtu kan ni thiang lo. Kan hotute kaltlanga min hunna theuhah mipui beiseina tha theih tawpa kan chhan a ngai. Ram rorelnaa Pathian ram a taka thleng turin kan inbuatsaih a ni,” a ti bawk.

ZPM chhung inkhawm hun hi Lalliansawta, President-in a kaihruai a ni.

Thlai pali leina tur Rs. Vbc 110 ruahman

Chief Minister Lalduhoma hovin Finance Department leh Planning & Programme Implementation department hotute chu nimin khan chief minister office ah an thukhawm a, sorkar policy-in a huam thlai palite leina tur Rs. vaibelchhe 110 an ruahman.

Thukhawmah hian chief minister duh danin thlai palite leina tur sum hi ruahman a ni a, November thla hlawh vawiin thlenga sawrkar hnathawkten an la lak loh chu pek chhuah nghal tura ruahman a ni a, healthcare bill tang pek tur Rs. vaibelchhe 40 ruahman a ni.

Chief minister chuan kum tina zirlai naupang scholarship pek chhuah hun tlai thin pawh kum thar atang chuan a hun taka pek chhuah theih dan dap turin department hotute chu a hrilh a, budget thar ruahman tan a hun tawh avangin budget an buatsaihnaah sorkar sum dinhmun dik tak, a nihna ang taka dah chhuak turin a chah bawk.

He hunah hian Finance Principal Secretary Vanlal Chhuanga chuan Finance Department hnathawh dan a sawi fiah a, Planning & Programme Implementation Department hmalak dante hi Lalmalsawma Pachuau, IRS, Secretary-in a sawi fiahna bawk.