Serchhip Bawrhsap David Lalthantluanga hovin Serchhip District-a Viksit Bharat Sankalp Yatra kalpui dan tur nimin khan rel a ni a, Serchhip District chhunga Sorkar laipui scheme kalpuitu Department te an tel.
Sorkar thuchhuahin a tarlan danin ram leh mipuite hmasawnna turin sorkar laipui chuan State Sorkar te kaltlangin scheme hrang hrang a kalpui mek a. Heng scheme a kalpui te hi a tak taka chhawrtu tur leh tangkaipui ber tur mipui mimirin chiang zawka an hriata, anmahni leh an chhungkaw tana tangkai taka an hman ve ngei theihna tura mahni tawng ngeia inzirtir leh inhrilhriat chu Sorkar laipui chuan a ngaipawimawh hle a. Viksit Bharat Sankalp Yatra hi November 15, 2023 atang khan Central Sorkar chuan kalpui tanin State tinah kalpui mek a ni a. Mizoram leh State dang pali, inthlan hmachhawn te erawh hun pawhfansak an ni a. Mizoram State hian December ni 14, 2023 hian State level-ah hawn leh kalpui tan a tum a ni.
Viksit Bharat Sankalp Yatra atan hian Serchhip District-ah Van pakhat tirh a ni ang a. December ni 18, 2023 atanga zin chhuak tanin Serchhip District chhung khaw hrang hrang a fang a nga. Heng khuaah te hian function buatsaihin Sorkar Official te leh scheme kaihhnawiha mipawimawh ten mipui zirtirna hun an hmang thin dawn a ni.
Serchhip Distritct Viksit Bharat Sankalp Yatra Nodal Officer atan Rebecca Laldinmawii Sailo, SDO (Sadar) chu ruat a ni a. Block level ah nodal officer atan Serchhip BDO leh East Lungdar BDO te ruat an ni a. Central Scheme kalpui tu department tin ten an department atangin a khawihtu tur bik Officer an inruat theuh dawn bawk a ni. Village level ah committee din tur tih a nih angin Block level Nodal Officer te kaihhruaiin Village Level Committee hi din a ni bawk ang.