Mizoram Larsap Dr Hari Babu Kambhampati chuan sorkar thar hnuaiah eirukna leh hlemhletna na taka do a nih tur thu leh sum inrenchemna kalpui tur chu Chief Minister office atanga a hniam ber thlengin kalpui a ni dawn tih a sawi.
Mizoram Legislative Assembly 9-na session hmasa ber, ni hnihna nimina neihah larsap chuan sorkar tharah eirukna leh hlemhletna um bo tum a nih thu hi a sawi a, “Eirukna chhui turin Central Bureau of Investigation (CBI) chu chhui phalna general consent pawh pek an ni ang,” a ti.
State sorkar sum dinhmun a that loh avangin sum leh paite awmze nei tak leh inren taka hman anih tur thu sawi bawkin, zan khat thilthua sum dinhmun siam that thut theih a nih loh avangin kum khat emaw chhung tal a mamawh dawn tih a sawi.
Larsap chuan sorkar thara an ngaih pawimawh tur thilte tar langin, sorkar tha, inrelbawlna tha tak hnuaia mipui tana hnathawh tum a nih thu te, langtlang leh innghahna tlak siam an tum thu te, sector zawng zawngah hmasawnna ngelnghet siam tura hmalaka industry sector lama tan lak te, mi tin ban phaka social security chhawp leh khua leh tuite mamawhna ang zawn zela hmalak te, thalaite tana hamthatna leh hmasawnna buatsaih te, thing leh mau, leilung, nungcha venhim leh humhalh leh khuarei thlenga chhawr tur leh hlawkpui tur hmasawnna ruhrel dinte tum a nih thu a sawi.
Budget-ah agriculture leh a kaihhnawih sector-a innnghat kuthnathawktute thar chhuah hlawk zawka hralh a nih theih nan sum ruahman a ni dawn tih larsap chuan sawiin, sumdawnna leh eizawnna bultantute leh thalaite hmakhua thlirin ‘Ban-a kaih policy’ hmangin puih an ni ang a; sawhthing, aieng, hmarcha leh hmunphiah mante bitukin a lei dawn tih a sawi a. Healthcare tichangtlungin huam zau zawkin mi tin tana siam that a ni dawn tih leh hmunhma leh hmanruate tun aia changtlung zawkin siam a ni dawn tih a sawi.
Mizoram larsap chuan MLA General Election neih zawh takah vote tla, za zela 80.43 lai a ni chu Mizoram mipuiten inthlan an ngaihven tawh hle tih a lantir tih sawiin, mipuiten an a rualawhnate hriatthiampui thei ber tura an ngaih sorkar thlan kawngah an mawhphurhna pawimawhziate an hre thara a lawmawm tak zet tih sawiin, MLA thlan tlinte lawmpuina leh duhsakna a hlan a; a bik takin a vawi khatna atana thlan tlin member 23-te a lawmpui tih a sawi.
State chhung hmun hrang hrang atanga hmeichhe MLA pathum thlan tlin chu Mizoram legislative history-ah a la awm ngai loh thu a sawi bawk.
Larsapin thu a sawi zawh hian a thusawia lawmthu sawina motion put luh a nih hnuah speaker chuan chawhma dar 10:50 khan session a titawp a, vawiin chawhma dar 10:30-ah chhunzawm lehin larsap thusawia lawmthu sawina leh session hmasa leh tun session inkara member hlui boral sunna neih a ni ang a, deputy speaker tur thlan a ni dawn bawk.