Mizo Zirlai Pawl (MZP) chuan sorkarin Mizoram Subordinate Services Selection Board (MSSSB) thiah a duh chhan hrang hrangte zir chian an tum.
MZP hruaitute chuan nimin khan Aizawl Press Club-ah chanchinbu mite kawmin an president, H. Lalthianghlima chuan sorkar tharin MSSSB thiah a tumnaah chhan tha tak a awm a, a aia thlakna tur tha deuhte an ruahman a nih chuan pawi an ti lo a; mahse, tun hma anga MPSC kuta a dah leh tawp a ni dawn a nih chuan an rem ti dawn lo tih a sawi a, hemi avang hian he board thiah an duh chhan point hrang hrangte an zirchiang dawn tih a sawi a; tun hmaa MPSC hna lak muang lutuk thin ang kha a thlen an duh tawh lo tih a sawi.
MZP president chuan National Institute of Technology (NIT) Mizoram hnuaia inawp danah te, sum leh pai hman danahte leh thawktu lak danahte hian thil fel lo tam tak inphum ru a awm nia an hriat thu sawiin, “Hna lak thenkhatah induhsakna uchuak leh tihtlin tum nei sa rana lak a awm tih hriat a ni,” a ti a. He institution-ah hian sum hman dan felfai tawk lo tam tak a awm avangin CBI pawhin an chhui hial tihte sawiin, hemi chungchang hi en zui zel an tum tih a sawi.
H Lalthianghlima chuan he institution-ah hian thawktu thenkhatten an hnuaia thawkte an duh ang anga an tih theih loh avangin an vau thin nia sawi a awm thu te, non teaching staff-te kaisan theih nan ministry-ah post sanction tura hmalakna lian tham a awm ngai lo nia an hriat thu leh zirlaite tana bus hire-sak, bill pek theih loh avanga hun rei tak tak zirlaite kal velna bus tlan thei lo te chu zirnain a tuar hle tihte a sawi.
Hetianga thil fel lo tam tak awm chungchang hre chiang tur hian RTI hmangin zawhna pe mah se chhanna mumal an hmu lo tih a sawi a, NIT Mizoram inawpna mumal lo lutuk chu pawi an tih thu a sawi bawk a ni.