Aston Villa in UEFA Europa Conference League round of 16 a an hmun tichiang turin point an hmu a, Zrinjski Mostar nen 1-1 in an inhnehtawk.
Ningani zanah Bosnia and Herzegovina-ah Villa hi Bijeli Brijeg Stadium-ah an inkhel a. An midfielder Nicolo Zaniolo chuan substitute John McGinn ball siamsak atangin an goal neihchhun a khung.
Premier League club in hnehna an chang mai dawn nia a lanlaiin an khingpuite hian huntawp dawn lamah Matija Malekinusic hmangin goal an khung a. A tawp thleng point hmu turin Villa in an beih nasat a ngai viau.
Unai Emery pawlte hi tunhnaiah league-ah an che tha viau a. Europe lamah round sang zawk luh ngei tum mahse league lam thlir telin team an insiksawi a, starting XI-ah mi pariat an thlak danglam.
Inkhel thunun hneh hle tho mahse goal hmaah erawh an huntha an hloh hnem a. Zaniolo bakah club chanchin a player manto ber Moussa Diaby ten first half a goal an khung loh a ho hle.
Italy midfielder in nipui a club a zawm hnua a goal hmasa ber a khung a. Villa hian second half-ah rawlthar midfielder Tommi O’Reilly an khelhtir bawk a ni.
Inkhel dangah Fenerbahce tan Edin Dzeko chuan goal hnih a khung a, 4-0 a FC Spartak Trnava hnehin Group H-ah pakhatna an ni a. Dinamo Zagreb in Bruno Petkovic goal hnih khung zanah 3-0 in Ballkani an hneh ve bawk.