Formula One a Swiss team hlun Sauber chuan nakkum a season lo awm turah kum 2019 hnua a vawikhatna atan an hming an hmang leh dawn a, season tharah Stake F1 Team Kick Sauber tih an ni ang.
Sauber team hian kum 2019 khan Italian car brand Alfa Romeo nen inremna neiin an hming an thlak a. Kuminah he inremna hi a tawp a, hei hi kum 2026 a Audi factory team ni tura an inleh dawn avanga hmalakna zing ami a ni.
Audi hian F1 luhchilh tura ruahmanna nei mahse team pumhlum pangngai anga a tel theih hma chu lo inrawlh a tum rih lo.
Sauber hi kum 1993 khan Formula One atanga intlansiak tan an ni a. An hming pangngai hmanga an inel reng tawh hnuah sum mamawhna a san avangin Alfa Romeo nen inremna an nei a ni.
Kum 2026 thleng an car ah Ferrari engine an hman chhunzawm dawn a, kum 2026 atangin Sauber team hi Audi ah an inlet dawn a, German company hian an hman tur engine an siam bawk ang.
Zirtawpni khan motorsport thuneitu sang FIA chuan season thar a team tel tur hming a tichiang a. Red Bull team te zawk Alpha Tauri chu hming thlak tura ngaih nimahsela Scuderia AlphaTauri RB tih an ni ang.