Zozam Times Dec 30: Indian Oil Corporation Limited Retail Sales, NE General Manager RK Sahab leh a thawhpui ten vawiin khan Chief Minister Lalduhoma hmuin, Mizoram Oil Depot a ranglama neih dan tur chungchang an sawiho.

Chief Minister chuan Brig. T. Sailo hunlaia an lo buaipui tan tawh Mizoram Oil Depot chu vawiin thlenga a la puitlin loh thu leh mamawhna a san tawh thu a sawi a. Ramria innghirnghona a awm chang te, kawngpui dangtu awm changte, khuarel chhiatna avanga kawngpui a pin chang tein mipui ten harsatna an tawk fo tih sawiin, harsatna thleng thin chu rang taka chinfel thuai an duh thu a sawi bawk.

Oil Corporation Limited Retail Sales, NE General Manager RK Sahab chuan a ram tur hmun remchang a awm phawt chuan hma an lak nghal theih tur thu Chief Minister chu a hrilh a. Khawvel thang chho zelah a remchan chuan Rel hmanga phurh thlen theihna hmun a that ber thu leh a zim berah ram Acre 25 a zau tal a tul thu te, mihringin an chim lutuk lohna hmun a that thu te a hrilh.

Chief Minister chuan a ram tur dap kawngah harsatna a awm loh a beisei thua chhangin, Supply Minister pawh a rang lama a lo sawipui tur thuin a chhang bawk a ni.