Aizawl : Lunglei district level consultative committee on aspirational block development – Lungsen chu nimin khan Lunglei Bawrhsap Ramdinliani hovin an thukhawm a. Sawrkar laipui atangin Mizoram chhunga district 3 atangin RD Block pakhat theuh – Aizawl district atangin Reiek RD Block, Saitual District atangin Ngopa RD Block leh Lunglei district atangin Lungsen RD Block te chu Aspirational block atan an thlang a. Hmalak dan tur chungchangah September 14, 2023 khan thutkhawm tawh niin, hemi ni atanga tun thlenga hmalak dan leh hmachhawp hrang hrang te an thlirho a ni.
Hun kal tawhah sorkar laipui chuan Mamit District chu Mizoram district dang te aia dawmkan ngai leh ngaihven ngai zawk tur Aspirational District atan a lo thlang tawh a, tuntumah chuan sawr zimin Block levelah an thlang leh ta a ni.
Thutkhawmah hian Lungsen BDO office-in an buatsaih Draft Block Development Strategy for Lungsen RD Block, Lunglei District chu chipchiar leh uluk takin an zirho a. He draft hi sawrkar laipuiin guidelines a lo siam zulzuia siam a ni.
Lungsen RD Block hmasawnna tura hmalak dan tur chu Theme 5 hnuaia sector 9-ah SWOT( Strengths, Weaknesses, Opportunities & Threats) analysis hmangin; Key Performance Indicators (KPI) tehna hrang hrang 39 in Aspirational Block chhunga hmalakna hrang hrang leh hmasawnna te chu teh a ni dawn a ni.