January 26 hi India ni pawimawh, ram danpui a hman tan ni, Republic Day a ni a, he ni hi ropui takin ram chhungah hman a ni thin. A hmanna pui ber, New Delhi-ah pawh sorkar laipuiin a lawmna a buatsaih leh dawn a, hetah hian state hrang hrangten a lem siamin an dinhmun leh an ziarang an pho chhuak thin a, chu chu tableau an ti a, ngaihhlut a hlawh hle thin.
Kuminah pawh hian hetiang hi buatsaih leh a ni dawn a, Delhi sorkar chuan Indian hnam pa, Mahatma Gandhi-an ram khawpui bera hun a hman dan hrang hrangte an pho lang dawn.
India hnam pa hian Delhi-ah hian ni 720 chauh hun a hmang a, heng zinga ni 144 chu a thih hmaa Birla House-a a chen lai hun a ni.
Delhi sorkarin Republic Day parade-a tel ve a tumna hi sorkar laipui pawhin a pawm tawh a, Gandhi-a nun dan hi pho lan an tum tih an puang a. “Delhi-a Mahatma Gandhi-an hun a hman dante hi tableau hmangin Republic Day parade-ah chhawp chhuah a ni ang,” an ti.
Delhi sorkarin tableau a pho chhuah tur buaipuitu, tourism department chuan kum 1915 leh 1948 inkarah Gandhi hian Delhi-ah ni 720 chauh hun a hmang tih a puang a. Kum 1921-ah Tibbia College a hawng a, kum 1946 leh 1947 inkarah Valmiki Basti-ah hna thawkin a awm ve zawk bawk tih an sawi.