Kolasib District Review Committee on RIDF/WIF chu nimin khan an Chairman, Kolasib Bawrhsap John LT Sanga hovin Kolasib DC Conference Hall-ah an ṭhu khawm a. National Bank for Agriculture and Rural Development (NABARD) aṭanga Rural Infrastructure Development Fund (RIDF) hnuaia sum puk hmanga Kolasib District chhunga hmasawnna hnathawh hrang hrang te an thlirho.
Chairman, Kolasib Bawrhsap chuan Kolasib District chhunga RIDF hnuaia hnathawh hrang hrang te chu Kolasib District leh mipuite tan a pawimawh hle tih sawiin, hna enkawltu department hrang hrangte chu ṭha taka hna thawh zawh a nih theih nan ṭan la zel turin a chah a. RIDF chu District chhunga hmasawnna ruhrel dinna tura hmanraw pawimawh tak a nih avangin RIDF kaltlanga hmalakna tur pawimawh tak tak dang pawh rawt chhuah belh zel turin line department aiawh kalkhawmte chu a chah bawk.
DLRC Member Secretary, NABARD hnuaia Kolasib District Development Manager JD Traite-in RIDF leh Warehousing Infrastructure Fund (WIF) awmzia leh NABARD aṭanga loan pek dan kalhmang tlangpui sawifiahin, Kolasib District-a RIDF/ WIF kaltlanga hna thawh zawh tawh leh thawh mekte a sawi a. Implementing department ai- awh kalkhawm ten an department hnuaia hna- thawh mek dinhmun sa- wifiahin, harsatna leh hm- achhawp awmte an sawi.
Kolasib District-a project kal mek te a hun takah ṭha taka thawh zawh a nih theih nana hmalak dan tur te, sum leh pai mamawh chak zawka dilchhuah a nih theih nana thil pawim- awh te leh RIDF/WIF hnuaia hnathawh tur hmabak chungchang te an sawiho bawk.
Sorkar thuchhuahin a tarlan danin RIDF hi kum 1995-96 aṭang khan kalpui ṭan niin, sector pathum – ei leh bar deh chhuahna leh a kaihhnawih (agriculture & allied), vantlang nunphung tihhmasawnna (social) leh thingtlang inkalpawhna tihchangtlunna (rural connectivity) atan te sum puktir (loan pek) ṭhin a ni a. Heng sector pathum hnuaiah hian hnathawh theih chi hrang hrang 39 a awm.
Kolasib District bikah department hrang hrang kaltlangin RIDF hnuaia hnathawh zawh tawh 58 awmin, heng atan hian RIDF loan Rs nuai 11,982.94 pek a ni a. Hnathawh mek 90 la awmin, hemi atana RIDF loan lak theih zat chu Rs nuai 41,473.32 a ni.
Thlai leh bungraw dahna (warehouse) sakna atan bika NABARD aṭanga loan pek ṭhin WIF hnuaiah Kolasib District chhungah Rs nuai 609.90 hmangin project paruk thawh zawh tawh a ni bawk.