Aizawl: Geology & mining (G&M) department chuan nikum 2023 chhung khan chhiah leh fee hrang hrang an lak atangin Rs vaibelchhe 13 chuang an hmu.
G&M department hotuten sawi danin January atanga December, 2023 chhung khan lung lakna atangin chhiah Rs. 11,70,43,061 an hmu a, balu lakna atangin Rs. 64,62,272 an hmu a, ONGC, Oil India te atangin petroleum exploration licence (PEL) fee atangin Rs. 1,25,05,890 an hmu.
He bakah hian an laboratory-a endikna man an lak atangin Rs. 3,37,030 an hmu bawk a, 2023 chhunga chhiah leh fee hrang hrang an lak atanga sum an hmuh zawng zawng chu Rs. 13,63,48,253 a tling a ni.
G&M hotute sawi danin, nikum chhung khan lung lak phalna (mining permit) mi 58 hnenah an pek chhuak a, mining permit, thar thawh 324 an awm bawk a, sorkar kum kal mek 2023 atanga 2024 chhunga sorkara sum an chhun lut tura an tuk chu Rs. vaibelchhe 11 leh nuai 80 a ni a, an target hi an khum ngei an beisei a ni.