Australian Open khelh mekah hmeichhe singles inelnaah Russian tleirawl tunhnaia hmasawn chak tak Mirra Andreeva chuan a player ngaihsan Ons Jabeur lakah hnehna a chang a, third round a inhlangkai.
Kum 16 mi Andreeva hian hmeichhe tennis a talent beiseiawm a nihna lantirin 6-0 6-2 in Jabeur hi a sawp a. Grand Slam final vawi thum khel tawh Tunisian player world number 6 nilai a talbuai nasa.
World number 47 ni lai Andreeva hian minute 54 chhung lekin hnehna a chang a. A chak hnuah, “Ani hmachhawn hi ka suangtuah fo thin zing ami a ni a, a chhan chu a inkhelh duhdan hi ka hmuhnawm tih chi leh ka ngaihsan chi tak a ni. Kan inhmachhawn tuma ka chak thei hi ka tan a hlu hle.” tiin Andreeva chuan a sawi.
Andreeva hi kumin Australian Open khelh mek a kum 16 mi la inel awmchhun a ni a. Nikum khan kum 15 mi niin Grand Slam a khel tan.
WTA tournament a khelh vawi hnihna lekah Madrid Open-ah round of 16 a lut a. Hemi hnu hian Grand Slam hmasa berah French Open third round lutin Wimbledon-ah round of 16 a lut leh bawk a ni.
Diane Parry hmachhawn leh tur Andreeva chuan, “Professional tennis ka khelh tawha ka la khelhthat ber a nih ka ring hial. Set khatna ka rin phak bakin ka kheltha a, set hnihnaah pawh ka tlahniam em em lo.” tiin a sawi zui.
Champion lai Aryna Sabalenka chuan kum 16 mi dang Brenda Fruhvirtova chu 6-3 6-2 in a hneh ve bawk a. Czech tleirawl Fruhvirtova hian ani aia tawnhriat leh thahrui ngah Sabalenka lakah hian khelchhe lo mahse a ruh la no zawk a nihna a lang.
Seeded number 10 Beatriz Haddad Maia chuan Andreeva thiannu kum 16 mi tho Alina Korneeva chu 6-1 6-2 in a hneh ve bawk.