Thawhlehni zana an ram an kah hnuah Pakistan chuan a chhan let nan missile hmangin Iran a kap let ve a, mi pakua an thi.
Pakistan hian Iran chhimchhaka Sistan-Baluchestan province-a ‘mi firfiakte tawmna’ an kap niin a insawi.
Iran chuan he thil hi a dem thu sawiin hmeichhe pathum, mipa pahnih leh naupang pali an thi niin a sawi.
Thlawhna atanga inkah hi thil hrang hrang avanga tun laia Middle East boruak a sosan lai taka thleng a ni.
Israel chu Gaza-ah Palestinian pawl, Hamas nen an indo mek a, Iran-in a puih Lebanon-a mi, Hezbollah bakah Iran-in a puih tho, Iraq leh Syria-a pawlte chu US sipaiten an kap a. US leh UK hian Iran-in a puih, lawng beitu Houthi chu a bei bawk.
Pakistan foreign ministry chuan Iranian khawpui pakhat, Saravan bul an kah tak hi ‘hnu chhuina tha tawkin heng laiah hian firfiakte lian tham takin an che tla’ tih an hriat vang a nih thu a puang a. Iran ram inrelbawlna leh an ram chin inrel dan chu ‘an zahsak hle’ tih an sawi bawk.
Pakistan sipaiin a hranga thuchhuah an siamah drone, rocket leh long-range missile hmangin Balochistan Liberation Army leh Balochistan Liberation Front an kap tih an tar lang ve bawk.
Heng pawl pahnih hi kum rei tak atang tawha Pakistan chhimthlang hmun kilkhawr laia Balochistan ram inrelbawlna hran duha nawrtu an ni.
Pakistan hian Iran-in an ram a kah kha an dem thu an sawi tawh a. Iranian nena an inrina bul, Balochistan province kapin Islamabad hian naupang pahnih an thi niin a sawi.
Iran erawh chuan an kahte hi Baloch Sunni Muslim pawl, an ram chhunga beihna thlen thin, Jaish al-Adl an nih thu leh Pakistan khua leh tui tumah an khawih loh thu an sawi.
Iranian sorkar chanchinbu chuan Tehran hian Pakistan chargé d’affaires chu an ram an kah chungchangah a ko nghal niin Ningani khan a sawi a. Pakistan hian a hmain an ambassador a ko haw nghal bawk.
China, Turkey leh Afghanistan-a Taliban sorkar chuan inbengdaia inbe zawk turin a ngen ve ve.
Pakistan hian tun laia Middle East rama buaina awm mek leh Israel-in Hamas a beih meknaah hian aw a la chhuah ngai lo va, Gaza-a chengte hi a Muslim-puite an ni a, sakhua ang zawng chuan an rama tang tura ngaih a ni a, hetih lai hian khawthlang ram puihna a mamawh hle bawk.