Lengpui Airport-ah khualzin lut chhuak an pung a, sum a lak luh pawh nuai sang bi a kai chho tan.
‘India hmarchhak state chhunga International Airport-te pawhin an tluk lo tan tiin chhuang takin kan sawi ve ngam tawh,’ tiin Lengpui Aiport thanzia Civil Aviation Wing hotuten an sawi a, finance department-in tangka kum kal meka sum an hmuh tur an bituksak, Rs nuai 2,000 pawh an hmuh ngei an beisei tih an sawi.
Civil Aviation Wing hotute chuan April-November 2023, thla riat chhungin airlines company-te hnen atanga sum a hmuh chu Rs nuai 1,200 chuang a tlin tawh thu an sawi a, “Hetiang a nih zel chuan 2023-2024 chhunga kan target, Rs nuai 2,000 hi chu kan hmu tling ngei ang,” an ti.
Kum hnih kalta vela an dinhmun sawiin, “Kum khata kan sum hmuh hi Rs nuai 280 bawr vel chauh a ni a, nikum chho atang khan sum hmuh hi a letin a rawn pung chho tan,” an ti a; hei vang hian Lengpui Airport hi enkawl châk pawh an pun phah tih an sawi.
Khualzin lut chhuak pawh an pung chho nasa hle tih an sawi bawk a, 2023 leh 2024 kum tir chhoah chawhrualin nitin khualzin lut chhuak mi 1500 vel neih ziah thin an nih thu Civil Aviation Wing hotute chuan anmahni kawmtu chanchinbu mi thenkhat an hrilh.
Hetia airport a lun chho zel lai hian thawktu lam indaih tawk lohna erawh an nei nasa tih an sawi tel a, tun dinhmunah airport hmunhma tifaitu, sweeper hi mi pali chauh an awm a, heng hnathawktute hian theihtawp an chhuah chungin mihring an tlem avangin faina kawngah erawh induh khawp lohna a awm lo thei lo tih an sawi.
Khualzin bungraw nawr kualna, trolley dah enkawltu, trolley boy an indaih lo hle tih a, “Trolley boy kan tih mai, a nghet loa chhawrte hi an tam tawk lo a, hei hian khualzinte harsatna a thlen phah,” an ti.
Mi dang kuta hlan tumna awm chungchang zawhna pawh chhangin, tun hnaia than chhoh em avangin Airports Authority of India (AAI) lamin an kut pe turin sorkar an lo dawr thuk tawh hle thin tih an sawi a, hetihlai hian AAI-in draft agreement an siam erawh Mizoram hmakhaw ngaihtuaha fuh lo leh tha tawk lo a awm avangin inremna an nei thei ta lo tih an sawi bawk.