Nimin khan Dr HTC Lalrinchhana, Special judge (prevention of corruption Act) chuan Lai Autonomous District Council (LADC) a zirtirtu 36 lak leh thil dang kaihhnawih a dik lo taka eirukna ni ngeia hriat chungchangah thuremna a ti chhuak a. Thiam loh chantir zingah LADC chief executive member nilai V. Zirsanga chu a tel a. Hremna hi thawhtanni a puan tur anih thu puan chhuah a ni. Politics hmanga eirukna chungchangah hian tunhnaiah hremna tawk an awm ta nual a. Kum hlui lam khan Chakma autonomous district council hruaitu engemaw zat chu thiam loh changin jail ah thawn luh an lo ni tawh bawk.
Thuremna zawng zawng han chhiar chian hian a vai hian politics thuneihna hman dik loh atanga thil dik lo hi lo chhuak a ni vek tih a chiang hle. A bik takin chhim lama autonomous district council huamchhungah hian politics hmanga hlemhletna in kua a hreuh langsar zual a. Hetia hremna judge in a han puang ta pawp pawp mai hian chhim lam politucs bawlhhlawh lutuk pawh a then thianghlim deuh ngei a beisei theih ang.
Chhim lam hi tunah an langsar rih a. Politics hmanrua hmanga eirukna hi chhim lamah chang a thleng a ni lova. Kan ram pum pui hi a luhchilh thuk em em a. Mahse, kan politician te hi an thuneihna hmang vek hian an inveng thin a. Dik taka kal pap pap ngam pawh hi an awm hlei thei tawh lo. Sawrkar liam ta leh a hma leh hunah pawh sawi neuh neuh a tam. Mahse, thuneitu berin chhui an duh ngei a nih loh chuan engmah a tih theih chuang loh a. Mipui an phun lungawi leh lo thei thin lo.
Politics vang a ni emaw, eirukna hrim hrim hua a, kan ramin a tawrhzia tlangau puitu sawrkar kan nei thar a. Anni hian eirukna bei let tur hian state chhunga kan uisathiamte mai ni lovin, central lam uisathiam thlengin an ruai duh dawn niin a lang a. CBI koh luh tih leh Lok Ayukta thuam chak te sawi a tam a. Hengte hian fel lo leh dikhlel lai chu han hmatiam chat chat tan teh se. A hmaa sawrkar thin te khan politics a in umzui an duh ngai lova. An in ngawihsan ral thin. Hun a lo kal deuh a, a hmaa mite ang thoah an chhuak leh thin bawk. Mi tam tak chuan sawrkarna an chan a, a hmaa mite umzui duh loh hi sawi mam nan mihring in khawngaih tawn leh chhe lutuka in tih zui duh loh vang niin an sawi thin. He ngaihdan hi kan ram politics a thil tha lo thlentu dik tak pakhat a ni a. Hrem hlauhna an neih loh avangin mi tam tak hian thil sual an ti thin. Kan in hrem ve hi a hun tawh a. Politics ah mipuiin ram rawng bawl turin thuneihna kan pe te te a, engkimah an chawm a, an hawp a, an daibaw bawk an tih ang deuhin an tal ta thin a. Hei hian kan ram a tihchhiat dan hi a nasa tawh lutuk a. Tunah chuan kan ram hian zaipui (major operation) a mamawh ta a. A tuar tawk pawh awm a ngai ang. Chu chauh chu kan intih dam theihna kawng awmchhun ni ta in a lang. Kan uisathiamte leh roreltu (judge) ten tan han la zual sauh sauh teh se. Chu ngei chuan thangtharte khawvel êng a siam beisei ila.