Aizawl: Higher & Technical Education minister Dr. Vanlalthlana’n zirbingna lo awm tawh hmangin a department chan hnuaia hmalakna awm turte thawh an tum thu a sawi.
Nimin khan research lama hmasawnna a awm theihna atana Pachhunga University College-a buatsaih, ni hnih awh ‘National Level Research Methodology Workshop’ kharna a hmanpui a. Thusawiin Dr Vanlalthlana chuan, Mizoram sorkara a department chan hnuaia hma a lakna hrang hrangah PUC kalphung thate entir nan a hman thin thu sawiin, “Ram hmasawn nan zirbingna chu thil pawimawh a ni. Zirbingna (research) lo awm tawh hmangin ka department chan hnuaia hmalakna awm turte pawh thawh kan tum a ni,” a ti.
He workshop-ah hian Prof. D. P Singh, School of Research Methodology, Tata Institute of Social Sciences, Mumbai hnen atangin research kalpui dan chi hrang hrang ngaihthlak a ni a. Prof. Lalnuntluanga, Controller of Examinations, MZU te, Prof. HT Lalremsanga, Dept. of Zoology, MZU leh Prof. Lalhriatzuala, Dept. of Physics, PUC te hnen atangin research kalpuina atana pawimawh chi hrang hrangte ngaihthlak leh zirchian a ni bawk.
Workshop kharna inkhawm hi Dr. HC Lalchhuanawma, IQAC Coordinator, PUC chuan a kaihruai a, Prof. H. Lalthanzara, Principal, PUC chuan Minister lawmna thu leh Research Methodology workshop neih anih chhan a sawi a, MLA a thlan tlin leh Minister anih lawmpuina khuallian hnenah a hlan nghal bawk.