Hmeichhe tennis a world number one ni lai Iga Swiatek chu Australian Open atangin a tla hma viau teuh hle a, Danielle Collins lakah set hloh mahse hnehna chang turin a sual let hlawhtling.
Kum 22 mi Swiatek hian set a hloh hnuah 4-1 in hniam zawk zui mahse a tawpah thapui nen a tang a, Collins hian veng zo lovin 6-4 3-6 6-4 a chakin third round a lut.
Tunhnai kum hnih chhungin Polish nula hi hmeichhe tennis inelna sang ber WTA Tour a player chungnung ber tia chhal ngam a ni a. Mahse Ningani a Melbourne Park a inkhelah erawh a kheltha tawk lo.
“Ka haw a hun teuh hman hle, airport a awm tawh ang vel ka ni hman.”
“A tawp thlenga beih kha ka inhuam a ngai. Duhthusam a tha in a khel tih ka hria a, mahse tu tan pawh khatiang anga tha a khelh tluan kha a theih loh tih ka hria. Chuvangin tihsual a neih huna remchang a la thei tura ka inpeih a ngai tih ka inhria.” tiin Swiatek chuan a sawi.
“Huntha ka neih velah theihtawp a nawr ka tum a, ka tum ang ngeiin ka ti thei hi ka lawm. A chhan chu thil awlsam a ni lo.” tiin a sawi.
Third round-ah hian Mccartney Kessler 6-3 1-6 6-4 a hnehtu kum 19 mi Linda Noskova a hmachhawn leh ang.
Seeded number 5 changtu American star Jessica Pegula chu round hnihna paltlang zo lo langsar ber a ni a. French mi Clara Burel chuan 6-4 6-2 in a hneh.
World number 51 Burel hian top 10 rankings a awm player a la hneh ngai lova, mahse a khingpui hi minute 70 chhungin a hneh a ni.