Australian Open a seeded number two nihna changtu Carlos Alcaraz chuan third round lut turin Lorenzo Sonego a hneh.
World number two ni lai Alcaraz hian a khingpui Italian mi hi set li chhungin hneh mahsela inkhela a chak dan erawh a awlsam lo. Rod Laver Arena-ah hian 6-4 6-7 (3-7) 6-3 7-6 (7-3) a chakin tie-breaker vawi hnih khelh a ngai a, Sonego-a’n nasa takin a fiah.
An inkhelh laia thli thaw nasa in player pahnihte inkhel a nghawng avangin nidanga an inkhelh thin angin an inlan lo. Thli in Alcaraz-a inkhel nghawng nasa zawkin Sonego tan huntha a inhawng a. World number 46 hian a khingpui hi kawng engkimah a el tawk hle.
Darkar thum leh minute 25 inkhelah hian set li naah tie-break hmangin Spanish star in vanneihna a chang ta zawk.
Grand Slam vawi hnih champion tawh Alcaraz hian a vawi hnihna atan chauh Melbourne-ah hian third round a luhna a ni a. Nikum khan inhliam avangin Australia-ah hian a inkhel lo.
“Vawiina ka inkhelh danah ka lung a awi hle. Boruak awmdan avangin inkhelh a harsa kan ti ve ve in ka hria. Thli leh nisa avangin nidang boruak a ang lo deuh.”
“Nidang anga han khelh mai a harsa deuh a, mahse tlak hniam loh hram kha ka tum. Set hnihna erawh ka ven theih a ni lo.” tiin Alcaraz chuan a sawi a. Chinese wildcard Shang Juncheng nen an inkhel leh ang.
Inkhel dangah seeded number 6 changtu Alexander Zverev chyuan qualifier Lukas Klein a hneh lo teuh viau a. Darkar li leh minute 30 inkhelhnaah kum 26 mi Olympic champion hlui hi 7-5 3-6 4-6 7-6 (7-5) 7-6 (10-7) in a chak hram a, world number 91 Alex Michelsen a bitumk leh ang.