India-a thlawhnaa chuang pakhat chu an thlawh laiin darkar khat chuang zet thlawhnaa inthiarna kawngka kalhna a chian loh avangin a tang.
SpiceJet thlawhna, Mumbai atanga Bengaluru khawpui pan niin dan pangngaiah minute 105 thlawh tur a ni a, hun tam zawk chu inthiarna pindanah a tang a ni.
Thawhlehni tuka Bengaluru-a an tum hnuah chhanchhuah a ni chauh a ni.
SpiceJet chuan ngaihdam dilna an tichhuak nghal a, ‘passenger tana harsatna an thlen’ chu pawi an tih thu an sawi bawk.
Thlawh chhung zawngin kan crew-ten passenger hi an buaipui a. An thlen hnuah engineer-in a hawng ta chauh va, damdawi thiamte pawhin an buaipui nghal bawk a ni,” tiin SpiceJet thupuangtu chuan BBC a hrilh a, airline hian a chuan man pawh an kir dawn tih an sawi bawk.
Airline hian passenger chungchang hi engmah an sawi thui duh lo va; mahse, chanchinbu pakhat chuan ‘mak a ti hle’ tih chu an tar lang.
“Mumbai atangin Bengaluru thleng inthiarnaah a tang a, pindan chep takah a awm char char a ni,” tiin Bengaluru airport-ah thuneitu pakhat chuan Times of India hnenah a sawi.
A tang tih a sawi lo hretu thawktu pakhat chuan kawngka hi hawnsak tumin a bei nasa hle bawk tih a sawi.
Airhostess-in a hnuah lehkha rawlh lutin chiai lo turin a hrilh bawk tih a sawi bawk.
“Ka pu, hawn tumin kan theihtawp kan chhuah a. Chiai lo va, reilo teah kan thleng tawh dawn a, commode kha tieng la, thu mai rawh. Kawngkapui ber hawn theih hunah engineer-in a lo hawng dawn a ni,” tiin a ziak.
Hetiang thil hi union aviation minister-in thlawhna tumhmun lian parukah passenger-te harsatna buaipuitu tur ‘war room’ siam a nih thu a puan hnu lawka thleng a ni.
Pathianni atang khan India-a tumhmun lun ber pakhat, Delhi chu chhum leivakin a bawh nasat avangin tual chhunga thlawk tur thlawhna tam tak tihkhawtlai a ni.
Airline-te chuan chhum leivak tam lutuk an puh a, passenger-te chuan airline leh tumhmun lamin thil an hrilh tha tawk lo niin an puh ve thung.