Social media lam khawih thinte chuan an hria ang a, tun lai hian #10YearChallenge tih a lar hle a. Hei hi India rama sorkar lai, BJP pawhin remchangah hmangin inthlanpui neih mai tawh tura campaign nan leh sorkar hmasa, Congress kaihhruai sorkar beihna atan an hmang a, kaihlekin #5YearChallenge tiin social media-ah thlalak an vawrh darh nasa hle.
BJP hian kum 5 liam ta leh tuna an kaihhruai sorkar din hnu kum 5-a thil danglam tawhzia an tar lang chuai chuai a. A langsar ber pakhat chu Prayagraj, Uttar Pradesh-a Kumbh Mela neih mek chu a ni a. Uttar Pradesh-ah hian Chief Minister Yogi Adityanath-a kaihhruai sorkar a ding mek a, Congress sorkar hun lai nena mela atana sum ruahman (budget) pun nasatzia an tar lang.
“Hei hi kan #5YearChallenge ve chu a ni a. Kum 2013 kha chuan budget hi Rs. Vbc 1,300 chauh a ni a, kum 2019-ah chuan Rs. Vbc 4,200 ruahman a ni,” tiin Twitter-ah an tar lang.
‘Hman leh tun’ tihna ni deuh ber, he challenge-ah hian Uttar Pradesh-a thlawh tumhmun, kawngpui, lei leh thil dang dang inthan hleihzia lantir thei tar lan a ni a. Union Minister Smriti Irani meuh pawhin railways lam thil a danglam nasat tawhzia a pho lang a ni.
Minister Piyush Goyal pawhin hun rei tak Bogibeel Bridge lei dawh zawh theih loh, dawh zawh ta chu a hlui nen dah kawpiin challege-ah hian a pho lang a. Kollam bypass, Western Peripheral Expressway, One Rank One Pension te pawh an vawrh lar zual a ni.
An tarlan (tweet) pakhatah chuan India khawpui lianah Modi sorkarah firfiakte chetna avanga civil thi an awm loh thu te, ei rukna chungchangah scam a awm ve loh thute pawh an tar lang tel nual bawk.