Australian Open a seeded number one nihna neitu Novak Djokovic chuan Melbourne inelna lian a vawi 100 a inkhelhnaah hnehna a chang a, fourth round lut turin Tomas Martin Etcheverry a hneh.
Djokovic hian a match hmasa lamah nidang angin kheltha lo mahse Zirtawpni a third round inkhelah erawh a theihna ang takin a khelchhuak a. A khingpui seeded number 30 hian theihtawp chhuah mahse a veng hleithei thin lo.
Kum 36 mi hian a Grand Slam title 25-na lak tumin a bei mek a. 6-3 6-3 7-6 (7-2) a chakin Australian legend Margaret Court-i record khum a professional tennis a Grand Slam title la hnem ber nih a tum mek.
Melbourne-ah hian Djokovic hian match 100 a khelh atangin vawi 92 hnehna a chang tawh a. Grand Slam pali a vawi 100 inkhel tling vek tawh hmasa ber a ni a. French Open-ah vawi 108 inkhel tahwin Wimbledon leh US Open-ah vawi 103 leh 101 a inlan tawh.
Vawi 10 a champion tawhnaah kuminah Djokovic hian round hmasa pahnihah beisei a pha lova, tun tumah erawh tihsual nei mang lovin a huntha neihah point a vawchhuak hnem.
“Tun tournament a ka la khelh that ber a ni. Ka inkhelh danah ka lung a awi a, a tir set hmasa pahnih phei kha chu tha tak ka ni. Set hnuhnung berah a theihtawp a chhuah a, tie-breaker khelh a ngaih phah a ni.” a ti bawk.
Zirtawpni inkhel dangah Stefanos Tsitsipas chuan seeded number 12 Taylor Fritz hmachhawn leh turin Luca Van Assche chu 6-3 6-0 6-4 in awlsam angreng takin a hneh ve bawk a ni.