Kumin Australian Open khelhmek a player ngaihven hlawh tak kum 16 mi Russian tleirawl Mirra Andreeva chuan set thumnaah ‘comeback’ ropui hmangin hnehna a chang a, round li na a inhlangkai.
Zirtawpni khan French player Diane Parry nen an inhmachhawn a, set hmasa ber chiang taka a hloh hnuah 1-6 6-1 7-6 (10-5) in a chak a. Set hnuhnung berah hian 5-1 a hniam zawk a nih hnuah huaisen taka bei letin tie-breaker khelh ngaiin a tho leh a. A tawpah a tlo zawkah a tang.
Nikum Wimbledon a fourth round lut tawh Andreeva hian kuminah a vawikhatna atan Australian Open a khel a. player langsar Ons Jabeur a hneh tawh avangin ngaihven a hlawh zual viau.
A chetthat avangin British star Andy Murray chuan social media lamah a fak nasa hle a. Hemi chungchang hi a chak hnuah sawiin, “Ka inkhel a en emaw a sawizui pawh ka lo beisei lo hrim hrim. A thusawi ka hmuh a, a lo comment ka hmuhte khan ka la print chhuak ang.” tiin fiamthu in a sawi.
Inkhel dangah champion lai Aryna Sabalenka chuan a lallukhum humhim turin thawm ring tak neiin ke a pen chhunzawm a. Lesia Tsurenko chu minute 52 chhungin 6-0 6-0 in a hneh.
Seeded number two nihna changtu Sabalenka hian kuminah Melbourne Park-ah hian match thum khel tawhin hetih chhung hian game ruk chauh a la hloh.
“Nikum khan Iga Swiatek khan 6-0 a set lak a ngah hle a, kuminah ani tluk ve kha ka tum a ni.” tiin a chak hnuah a sawi zui.