Mexico-a che rawng thei tak, Gulf Cartel-a an pawl peng pakhata an hruaitu chu man a ni tih tual chhung chanchinbuten an tar lang.
La Kena tih leh Ciclon 19 tia an sawi thin, José Alberto García Vilano-a hi Los Ciclones tan in (cell)-a tharum thawhna thleng pawh ama chawh chhuah nia hriat a ni.
An pawl hian nikum March thla khan US khua leh tui pali hruai bovin pahnih an that nghe nghe.
Vilano-a hi thuneituten a awmna chin an hriat ruk an bawhzuinaah Monterrey khawpuia shopping plaza-ah man a ni a, inkahna pawh a thleng nual.
Social media-a thlalak thehdarhah chuan Vilano-a leh a thuihhruaite hi mall atangin ralthuam keng police-ten an hruai chhuak lai pawh a lang.
US mi palite hi Texan khua, Texan atanga hnai tak, ramria Matamoros khawpui atangin ruk bo an ni.
Matamoros hi Gulf Cartel-a pawl pahnihin thununtu zawk nih an inchuh reng a ni a, an khua hi hmar lam atanga US-a ruihhlo tawlh luhna khân a ni.
American-te hi ramri kânin cosmetic surgery ti turin an kal niin an chhungte chuan an sawi a. Hetianga an thenawm rama zin hi American tan thil thar ni lovin damdawi tlanin Mexico-ah an lut fo va, damdawi hi a tlawm zawk a; mahse, a hlauhawm hle a ni.
Video thehdarhah chuan an pali hian pickup truck-ah ralthuam keng mipaten an hlang a. An zinga pakhat chu mi pakhatin a hruai a, mi dang erawh chu nikhua an hre lo a ang a, truck-ah hian an hnuk lut a ni.
Chhanchhuah tuma beih chhung vel hi ni li zet a ni.
An zinga pahnih, Zindell Brown leh Shaeed Woodard te chu thah an ni a, inkahna bul hnaia ding Mexican hmeichhia kum 33 mi chu a thi tel bawk.
American an beih chhan hi hriat a ni lo va; mahse, Mexican thuneitute erawh chuan pawl dangin an hmelma pawla mite emaw tiin an tisual a ni thei tih an sawi.
Hemi hnu lawkah hian Gulf Cartel-a peng dang, Scorpions Group chuan mi ruk bo avangin ngaihdam an dil a, anmahni tihah an chhal.
Kum 2022 khan Matamoros awmna, Tamaulipas state sorkar chuan Vilano-a an man theih nan a lumanah peso 25,00,000 ($1,45,000; £1,15,000) an chhiar.
US Drug Enforcement Administration (DEA) pawhin man an duh niin an sawi.