India khawthlang lam, Gujarat dila lawngleng khupa thi sikul naupang nu leh pate chu an lawm lo hle a, an fate hi ‘life jacket’ haktir an ni lo niin an sawi.
Zirlai 12 zet, kum sarih leh kum 12 inkar leh an zirtirtu pahnihte hi Ningani khan Harni Lake, Vadodara khawpuia lawng chesualah an thi a ni.
Police chuan he thil thleng chungchangah hian mi pahnih an man tawh.
Ruang la hmuh loh an awm nual a, zawn hna thawh chhunzawm zel a ni.
Zirlai pariat leh zirtirtu pahnih chhanchhuah an ni a, a bul hnai damdawi inah enkawl mek an ni tih thuneituten an sawi.
Chetsualna thlen chhan hi hriat a la ni lo va, a hmutute chuan lawng hi mi 14 chuan theihna tur a nih laiin a aia tam daih an chuang niin an sawi.
He vanduaina thleng hian ram pum a luah a, nu leh pate chuan thuneituten an fate nunna an tiderthawng a, hlauhawm takah an awmtir a, himna dan zam a nih loh thu an sawi hlawm.
Zirlai chhanchhuah zinga mi, Asma Sheikh chuan sikul thuneitute hian zirlaite hnenah life jacket an pe lo hrim hrim niin a sawi.
Union Minister Harsh Sanghvi chuan zirlai 10 chauhvin life jacket an ha a, a tam zawk chuan an ha lo tihna a ni.
Ninganiah pawh khan nu leh pa tam tak chu chetsualna bulah an la awm a. Tam tak chuan an fate chu himna tur hmanrua pe lova lawnga chuantir nge an nih an zawt hlawm.
“He thil hi fimkhur lohna avanga thleng a ni a, a system, sorkar leh sikul mawhphurhna a ni,” tiin pakhat chuan a sawi.
Thenkhat phei chuan an fate lawnga chuanpui tur hi hrilh lawk an ni lo hrim hrim niin an sawi.
Zirlai thi zinga pakhat farnu, Naushin Gandhi-i chuan a nau hi water park-a kalpui tur angin an hrilh a, dil leh lawnga chuan chu hrilh an ni lo niin The Times of India chanchinbu hnenah a sawi.
“Chhiatna a thlen hnuah sikul thuneitute biakpawh kan tum a; mahse, tumahin min chhang lo,” a ti bawk.
Nu leh pa thenkhat chuan Gujarat thuneitute fimkhur loh leh inthlahdah vangin chhiatna a thleng zut niin an sawi bawk.
October khan Morbi-a pedestrian suspension bridge chimah mi 135 vel an lo thi tawh bawk.
Sanghvi chuan lawng khalhtu leh lei satu contractor chu dem tur an nih thu leh ‘tihpalh’ a nih loh thu a sawi.
Gujarat sorkar chuan lawng chetsualna hi chhui turin a ti nghal a, ni 10 chhunga report thehlut turin a ti.
Tual chhung chanchinbute chuan New Sunrise School-a zirlai 80 chuang chu picnic-in an kal a, an zinga thenkhat chu lawngah hian an lo chuang niin an tar lang.
BBC Gujarati chuan dil lai vela an awl laiin lawng hi a ‘inbuk tawk loh’ avangin a sawi ta chiam niin a tar lang.
India-ah hian lawng chesual hi a thleng fo va, lawngah hian mi an chuang tam thin a, enkawl uluk a ni lo va, himna hmanrua an hmang tha lo thin bawk.