Missile hmanga Yemen sipai training camp kahnaah sipai 70 vel an thi a, thuneitute chuan an pun ngei a rinawm thu an sawi bawk.
Marib province lailia inbeihna thlengah hian sipai eng emaw zat an hliam bawk niin thuneitute chuan an sawi a, he thil hi Inrinnia thleng kha niin an sawi bawk.
He camp hi an khawpui, Sannaa khawchhak lam km 170 vela hlaa awm a ni a, mosque-a mipuite an tawngtai lai taka kah niin sipaite chuan an sawi.
Yemen sorkar chuan a tituah hian Houthi helhi an puh a; mahse, mawhphurtua inchhal tumah an la awm lo.
Yemeni President Abdrabbuh Mansour Hadi chuan he beihna thleng hi a dem thu sawiin ‘a dawihzepthlak takzet’ tiin a sawi.
“A titute hi finfiahna la awm lo mah se Houthi helho an ni tih hi rinhlelh rual a ni lo va, anni hi remna duh ngai lotute an ni,” tiin a sawi bawk.
Houthi helho hian Yemen sipaite hi an lo bei fo tawh thin a. Nikum August thla mai pawh khan chhim lama lawngchawlhna khawpui, Aden-ah sipai parade lai chu missile hmang bawka kapin 30 vel an lo thi tawh.
March, 2015-a Yemen chhim lam zawng awptu, Yemen hian tharum hmanga Hadi sorkar paihthlak tuma an beihna chhuak atangin he ramah hian tualchhung buaina a chhuak zel a. He thil avang hian President Hadi pawh ram dangah a tlanchhiat a ngai hial.
Iran-a Shia Muslim leh Arab ram danga Sunni Muslim-ten sipaite hi puiin Hadi sorkar hi tun din leh tum mek a ni .