Australian Open a champion tura rinkai ber leh seeded number one nihna changtu Novak Djokovic chuan tournament a la dam midang zawng lakah vaukhanna awrawl ring takin a chhuah a. Seeded number 20 lakah game thum chauh hlohin quarter-final a lut.
Record thar ni tura Grand Slam title 25-na lak tum a bei mektu Djokovic hian Pathianni chhun khan French mi Adrian Mannarino a hmachhawn a. Darkar khat leh minute 44 chhung lekin 6-0 6-0 6-3 in a khingpui hi a sawp.
- Dan theih loh?
Kum 36 mi Djokovic hian a inkhel hmasa pahnihah set a hloh a, hei vang hian thenkhatin tun tumah hneh theih a nihna a lang niin an ngai. Hei bakah hian tournament tan tir lamah a dam loh avangin ngai a awh lo niin an sawi.
Nimahsela round thumnaah Tomas Martin Etcheverry hneh turin a kheltha hle a, a insiamthat hnuah a chetthat a chhunzawm.
Tun tum inkhelah pawh hian a tir atang chungnung nghal hle in set hmasa pahnihah game a la vek a. Kum 1993 a set hloh miah lova hnehna chan a thlen hnua hetiang thlen tir leh hmasa ber tur a ni mai dawn niin a lang.
Mahse Mannarino hian set thumna game hnihna a la a. Djokovic-a’n tan a hlawh em emna thin Melbourne Park-ah hian Rod Laver Arena a entu mipuiten Mannarino-a’n game a la chiah chu an lawmpuina thawm a ring.
“Set hmasa pahnih kha tunhnai hun engemaw chen chhunga ka khelh that ber pawl an ni ang.”
“Tunhnai ni hnih chhungin ka inbuatsaihna a tha a, ka taksa pawh a chak hle. Ka hriselna a tha a, ka tennis khelh pawh a that viau avangin tunah ka dinhmunah ka lungawi.” tiin a sawi.
Djokovic hian quarter-final ah seeded number 12 Taylor Fritz a hmachhawn leh dawn a. Ani hian nikum final khel Stefanos Tsitsipas a hneh.
Jannik Sinner chuan 6-4 7-5 6-3 in world number 15 Karen Khachanov lakah hnehna a chang ve bawk.